520-ე დადგენილების ამოქმედებიდან 3 თვე გავიდა. იღებს თუ არა ჯანდაცვის მინისტრი და პრემიერ მინისტრი პასუხისმგებლობას მინიმუმ იმ 200-ზე მეტი ადამიანის სიცოცხლეზე, ვინც ელოდება და 520-ე დადგენილების გამო ვერ იღებს მათი სიცოცხლისათვის გადაუდებლად საჭირო სამედიცინო სერვისებს კლინიკაში (დეფიბრილატორის, პეისმეიკერის ჩაყენებას ) და რომელთა სიცოცხლე შეიძლება ლეტალურად დასრულდეს.  


დამოუკიდებელი დეპუტატი, ლევან კობერიძემ ნინო ზაუტაშვილის საავტორო გადაცემაში რეალური სივრცე, 520 დადგენილების შედეგებზე ისაუბრა.

“ადამიანების რიცხვი, რომელიც ელოდება ოპერაციას, ყოველდღიურად იზრდება.  თითოეულ მათგანს შეიძლება პრობლემა შეექმნას ნებისმიერ დროს. როდესაც ჯანდაცვის მინისტრი ამბობს, რომ თითოეული ადამიანი არის მათთვის ძვირფასი, მაინტერესებს პასუხისმგებლობას იღებენ თუ არა ამ ადამიანების სიცოცხლეზე. ასევე თვითონ სისტემის შიგნით, არის დაძაბულობა.  ექიმი, რომელიც  საოპერაციოშია  არ უნდა ფიქრობდეს გადახარჯვაზე, ჩვენ კი  რეალურად  დადგენილებით ეს მივიღეთ. საზოგადოებისგან კი უნდობლობა მოდის, მაშინ როდესაც ამ სფეროს ყველაზე მეტად უნდა ენდობოდნენ.ადრე თუ ვიცოდით, რა იყო მეცხრე ბლოკი, დღეს ვიცით რა არის დეფიბრილატორი, აბლაცია, სარქველები და სხვა სიტყვები.“-ამბობს კობერიძე.

„დამოუკიდებელი დეპუტატების“ წევრმა, ლევან კობერიძემ  გადაცემა რეალური სივრცეში“ იმაზეც ისაუბრა, რომ ჯანდაცვა პოლიტიკური მიმართულებით ვითარდება.მაგალითად  კი ამერიკის ჰოსპიტალი მოიყვანა, რომელიც სახელმწიფო ბიუჯეტიდან ფინანსდებოდა,დღეს კი შენობის სასტუმროდ გადაკეთებას განიხილავენ, სწორედ იმის გამო, რომ დარგი გაპოლიტიკურდა.

რაც შეეხება  ექიმებს, რომლებიც  განცვიფრებულები არიან, თუ რატომ არ უსმენენ მათ მოსაზრებას და არ ასახავენ ადეკვატურად სხვადასხვა გადაწყვეტილებებში. კობერიძე აქაც სისტემურ პრობლემაზე საუბრობს.  

„როდესაც ჩვენ ვსაუბრობთ თუ  რა მიმართულებით ვითარდება დარგი, 2017 წელს მიღებულია ხედვა, რომელიც პარლამენტმა სამინისტროსთან ერთად შეადგინა,გარკვეული ინდიკატორების განსაზღვრით. ერთ-ერთ  შეხვედრაზე ქალბატონ ეკატერინე ტიკარაძეს ვკითხე-აქვს თუ არა ეს დოკუმენტი წაკითხული. თუ იცნობს შინაარსს  და არ ეთანხმება უნდა თქვას, რომ პოლიტიკას ცვლის, რადგან სამინისტრო არ არის პოლიტიკის განმსაზღვრელი სუბიექტი. პარლამენტთან ერთად,  ჯანდაცვის კომიტეტია  ის ადგილი, სადაც უნდა იკრიბებოდეს ინტერესთა ჯგუფები და არ უნდა გვიწევდეს გადაცემებში საუბარი.“-განაცხადა ლევან კობერიძემ.

კითხვაზე- არის თუ არა  პარლამენტში საკითხთან დაკავშირებით მზაობა და  ინტერესი, კობერიძე პასუხობს, რომ პოლიტიკური კონტექსტი იმდენად სჭარბობს სექტორს, რომ სხვა საკითხებზე არ მსჯელობენ. დამოუკიდებელი დეპუტატის თქმით,  ყველა იმაზე ფიქრობს, რომ არჩევნებში მისი ინტერესი გამოიყოს. 

„ამის ერთ-ერთი თვალსაჩინო მაგალითია ის თუ  როგორ დაინიშნა ჯანდაცვის ახალი მინისტრი, რომელიც მისი წინამორბედისგან განსხვავებით არ შეხვედრია მოსახლეობას, არ გაუცვნია თავის გეგმები.  ვიცით რომ, მუშაობდა საჩხერის სავადმყოფოში, შეიძლება კარგი კვალიფიკაციისაა, მაგრამ ის არის ერთი ადამიანის მიერ მოყვანილი მინისტრი.  შესაბამისად პასუხისმგებლობასაც, მხოლოდ ერთ ადამიანთან გრძნობს.  არც პარლამეტთან არც კომიტეტთან არც ექიმებთან არ არის პასუხისმგებელი.“-ამბობს კობერიძე.

რაც შეეხება ხედვას, რომელზეც დამოუკიდებელი დეპუტატი საუბრობს და რომელიც 2017 წელს მიიღეს, ლევან კობერიძის თქმით ნახსენებია, რომ იქნება  კარგი მინისტრი და  დაზოგავს თანხებს ბიუჯეტისთვის.

„თანხის შეკავება როგორც აქ ხდება არ არის სწორი. თუკი ბიუჯეტის შეკავებაა საჭირო ეს უნდა მოხდეს სხვაგვარად. პირველ რიგში, კლინიკებისთთვის სანებართვო ქაღალდების ჩამოყალიბებით. პროტოკოლის მიხედვით, უნდა განისაზღვროს ფასიც. მსგავსი  არაფერი არ გაკეთდა, პირდაპირ მოხდა თანხების სეკვესტრი. თუ ვინმეს უნდოდა ჯანდაცვის სისტემაში ხარჯების შეკავება, უნდა ემსჯელათ  პროფესიულ საზოგადოებასთან, თუ რამდენად შესაძლებელია ჩვენს რეალობაში ფასების დანერგვა და ბოლოს ტარიფიკაცია. ამის ნაცვლად პირდაპირ გამოითხოვეს ფასები კლინიკებიდან, გადათვალეს რაღაცები იმ ბნელ ოთახში და მერე დააკლეს ფასები, იმ მიზნით, რომ თითქოს თანაგადახდა პაციენტის მხრიდან შემცირდებოდა.“-ამბობს დამოუკიდებელი დეპუტატი.

კობერიძე საკითხთან დაკავშირებით მინისტრებთან  შეხვედრებს, პიარ შეხვედრებს უწოდებს და ამბობს რომ პრემიერ-მინისტრი გიორგი გახარია, რომელიც კლინიკების  პრობლემებს იზიარებს, ტიკარაძე კი ამბობს რომ გულს ვერ მოულბობენ, ცუდს და კარგს თამაშობენ ერთმანეთში.

„მახინჯი რეფორმის ანუ თანაგადახდისკენ კლინიკებს, მთავრობამ და სამინისტრომ უბიძგა. საჭიროების დროს,  კი ამ ფაქტს  კლინიკების საწინააღმდეგოდ გამოიყენებენ. ხარჯების  შემცირების ნაცვლად კი  პაციენტს, უფრო მეტის გადახდა უწევს დღეს საკუთარი ჯიბიდან.“-აღნნიშნა კობერიძემ და იმ კლინიკებზეც ისაუბრა, რომლებსაც არ გააჩნიათ მაღალი ხარისხი და მხოლოდ მფარველობის ხარჯზე ფუნქციონირებენ“-აღნიშნავს კობერიძე. 

მისივე ინფორმაციით, სწორედ  ამ ცუდი კლინიკების და არასწორი გადაწყვეტილების გამო,  თავისი  საქმის პროფესიონალი და მაღალი ხარისხის კლინიკები ზარალდებიან.

„ვინმეს ხარჯის შეკავება თუ უნდა, მინიმუმ 30-40 კლინიკა არსებობს, რომელიც ჩემი აზრით, დღესვე უნდა იყოს დახურული.დღეს ყველა ასეთი  კლინიკა მუშაობს, რადგან ასეთ კლინიკებს  მფარველები ჰყავთ.“-განმარტა ლევან კობერიძემ.

მისი განცხადებით,„ფრაქცია დამოუკიდებელი დეპუტატები“ მოითხოვენ  ჯანდაცვის მინისტრი ეკატერინე ტიკარაძე პარლამენტში მივიდეს. სწორედ საკანონმდებლო ორგანოში უნდა ხდებოდეს ინსტიტუციურ დონეზე ამ საკითხზე მსჯელობა და კლინიკებს, უნდა მიეცეთ საჯაროთ მსჯელობის საშუალება.

„როდესაც გამოსავალზე ვსაუბრობთ, პირველ რიგში, ამ ადამიანებთან, კლინიკების წარმომადგენლებთან,  უნდა იყოს საჯარო სივრცეში შეხვედრები.  გახარიას იმედი მე არ მაქვს რადგან დღე დღეზე მინისტრის პოსტს დატოვებს, მეორე კიდევ ახალი მოვა დაიწყებენ გარკვევას და ამ ადამიანებს კიდევ გადაუდებენ საქმეს. ამიტომ პარლამენტი არის ის ადგილი სადაც უნდა ეს საკითხი გადაწყდეს .“-ამბობს ლევან კობერიძე.

 მოამზადა ნათია ლომიძემ