კოვიდ სიკვდილიანობით პირველი ადგილი — უკვე შემდგარი და მიმდინარე ტრაგედია, რომელსაც ვერავინ და ვერაფერი გამოასწორებს (23 ნოემბრის მდგომარეობით ვირუსმა საქართველოს 11 608 მოქალაქე იმსხვერპლა!), მაღალი ინფლაცია (12,8%!) და ონლაინ კაზინოების წინააღმდეგ მორიგი გალაშქრება (ეს ნარატივი წინასაარჩევნო კამპანიას მოაგონებს ბევრს) - ეს 3 მთავარი მოვლენაა, რაც ეკონომისტებს პრემიერ-მინისტრ ირაკლი ღარიბაშვილის საქმიანობის შეფასებისას ახსენდებათ. 

აქედან გამომდინარე, ,,ეკონომიკური ტრანსფორმაციის ცენტრის“ ხელმძღვანელი რამაზ გერლიანი ღარიბაშვილის საქმიანობას ნეგატიურად აფასებს.

,,რთულია ირაკლი ღარიბაშვილზე დადებით კონტექსტში ვისაუბროთ, როცა მისი პრემიერობის პერიოდში ყველაზე მაღალი ინფლაციაა, მსოფლიოში კოვიდით გარდაცვალების მასშტაბით ,,მოწინავე“ პოზიციაზე აღმოვჩნდით.  პოლიტიკურ მოვლენებსაც თუ გავითვალსიწინებთ, ერთ-ერთი ყველაზე დასამახსოვრებელია აგრეთვე ყოფილი პრეზიდენტის მიხეილ სააკაშვილის დაჭერა, რაც ეკონომიკურ ფონზეც აისახება და ინვესტიციებს ამცირებს.  დასამახსოვრებელია იგი ეკონომიკური განვითარების 10-წლიანი გეგმის გაჟღერებით, რაც ძალიან პოპულისტური გეგმაა“, - ამბობს გერლიანი ,,კომერსანტთან“.

მისი თქმით, დადებით კონტექსტში შეიძლება სოციალური საკითხებისადმი ღარიბაშვილის დამოკდიებუილება დასახელდეს, კერძოდ,  სამუშაო ადგილებთან დაკავშირებით, სადაც აქცენტი სწორად დასვა,  მაგრამ გამოსავალი არასწორად შეირჩა.

,,ღარიბაშვილის განცხადებითან ისე ჩანს, რომ სამუშაო ადგილები შეიქმნება ხელოვნურად, რაც ისევ ბიუჯეტს დააწვება ტვირთად. დასაქმება შესაძლებელია მხოლოდ ჯანსაღი ბიზნეს გარემოს შექმნით და აქცენტი სწორედ ამაზე უნდა გაკეთებულიყო“, - ამბობს გერლიანი ,,კომერსანტთან“.

ზოგიერთ ეკონომისტს პირველი, რაც ღარიბაშვილის სახელის გაგონებისას ახსენდება, წინა საარჩევნოდ რეგიონებში გამართული ვიზიტებია. ასევე ეკონომიკურ ზრდასთან დაკავშირებით სულ ახლახან გაკეთებული განცხადება, რამაც ეკონომისტი აკაკი ცომაიას კრიტიკა დაიმსახურა.

,,რეგიონებში ვიზიტი, ტყიბულში, მაღაროელებთან შეხვედრისას ტურიზმის პოტენციალზე საუბარი განსაკუთრებით დასამახსოვრებელია. ამ თემაზე აქცენტირება კონკრეტულ სიტუაციაში, ცოტა არ იყოს, ღიმილის მომგვრელი იყო.  თუმცა, გაცილებით მეტი შეცდომა დაუშვა, როცა განაცხადა, რომ 2022 წლის იანვარში მშპ იქნება 65 მილიარდი ლარი და ეს იქნება ისტორიული მაქსიმუმი. ერთ სულ მოსახლეზე გადაანგარიშებით ეს იქნება დაახლოებით 5 500 დოლარი, რაც ასევე ისტორიული მაქსიმუმია. არ მესმის, რატომ მიიჩნია, რომ ეს 65 მილიარდი ლარი ისტორიული მაქსიმუმია, როცა ეკონომიკა ყოველწლიურად იზრდება, ეს ხომ აბსურდია, ეკონომიკის ასე  გაანალიზება შეცდომაა. მეორეც — ონლაინ კაზინოებთან დაკავშირებით, როგორი განზრახვაც არ უნდა ჰქონოდა, მისი მიდგომა თამაშის მიმართ დამოკიდებულებას ვერ შეამცირებს, როცა აზარტული თამაშის მსურველთათვის უამრავი ალტერნატივა არსებობს“, - ამბობს ცომაია.

შეგახსენებთ, რომ ირაკლი ღარიბაშვილი პრემიერ-მინისტრის თანამდებობას პირველად 2013 წლის ნოემბრიდან 2015 წლის დეკემბრამდე იკავებდა. 2021 წლიდან ის მეორედ გახდა პრემეირ-მინისტრი და ამ პოსტზე გიორგი გახარია ჩაანაცვლა.