თბილისს უახლოეს მომავალში კიდევ ერთი, ოთხვარსკვლავიანი განთავსების ობიექტი შეემატება. დედაქალაქის ცენტრში, გია ჭანტურიას ქუჩაზე Park Inn by Radisson შენდება. 200 ნომრიან სასტუმროს, 25 მლნ დოლარის ინვესტიციით „პარკ ჰოთელსი“ აშენებს. კომპანიის დირექტორი თორნიკე ჯანაშვილი გვიყვება, რომ შენობა 14 სართულიანია, 3 მიწისქვეშა სართულით, რომელიც უკვე აშენებულია. იგი ამბობს, რომ Park Inn Radisson- ის ბრენდის პირველი სასტუმრო იქნება საქართველოში, რაც მისივე თქმით, საინტერესო იქნება ქალაქისთვის. საინტერესოა სასტუმროს კონცეფციაც, რომელიც სკანდინავიური სტილითაა შემუშავებული. სიმყუდროვითა და სიმარტივით გამორჩეულ სასტუმროში მეხუთე სართულზე ბაღი-ტერასა მოეწყობა, რომელიც ხილვადი იქნება ჭანტურიასა და თაბუკაშვილის ქუჩების კუთხიდან. Park Inn ასევე საკონფერენციო დარბაზს, შეხვედრების ოთახებსა და სპა ცენტრ გააერთიანებს.
„მშენებლობა დროებით შეჩერებულია თუმცა, პროცესი ძალიან მალე განახლდება. სასტუმროს უპირატესობა პირველ რიგში მისი ლოკაციაა, ასევე აღსანიშნავია ის, რომ Radisson- ის ეს ბრენდი საქართველოში არ არის წარმოდგენილი და არის ძალიან საინტერესო კონცეფციის - მარტივი სკანდინავიური დიზაინის სასტუმრო - მინიმალისტური და დაბალანსებული. ექნება ძალიან დიდი საკონფერენციო სივრცეები, 500 კვ.მ ტერასა ულამაზესი ხედებით ძველ თბილისზე, ექნება საპარკინგე ზონები, რომელიც სამ სართულზე უკვე მოწყობილია. ასევე შენობის ბოლო სართულებზე მოეწყობა ძალიან ლამაზი სპა ცენტრი ღია აუზით, საუნით სატრენაჟორო დარბაზით ა.შ.“, - აცხადებს თორნიკე ჯანაშვილი.
„პარკ ჰოთელსის“ დირექტორი აცხადებს, რომ Park Inn by Radisson დედაქალაქის ცენტრში არსებულ მაღალი კლასის სასტუმროებს დიდი კონკურენციას გაუწევს. თორნიკე ჯანაშვილი ამბობს, რომ სასტუმროს ლოკაცია ტურისტებისთვის მიმზიდველი იქნება, რადგან იქვეა 9 აპრილის პარკი, პრეზიდენტის სასახლე და განახლებული ორბელიანი. მისვე თქმით სასტუმრო კონცეპტუალურად განსხვავებულია, სხვა პროდუქტია და ფასიც ხელმისაწვდომი იქნება. Park Inn by Radisson პირველ სტუმარს სავარაუდოდ მომავალი წლის ბოლოს მიიღებს.
ბაჩო ადამია