კარფურმა 2020 წელს საქართველოში 1 ჰიპერმაკეტი და 21 მცირე ზომის სუპერმარკეტი გახსნა, თუმცა გაყიდვებისგან მიღებული შემოსავალი 1 მლნ ლარით 473 მლნ-მდე შეუმცირდა, ფინანსური ზარალი კი ასევე 1 მლნ-ით 33.5 მლნ ლარამდე გაეზარდა. აუდიტის დასკვნის მიხედვით მართალია გასაყიდი პროდუქციის თვითღირებულება 9 მლნ-ით 372 მლნ-მდე შემცირდა, ფინანსური ხარჯი 8 მლნ-ით 48 მლნ ლარამდე გაიზარდა.

კარფური საქართველოში 2011 წლის დეკემბერში დარეგისტრირდა, პირველი ჰიპერმარკეტი კი 2012 წლის სექტემბერში სავაჭრო ცენტრ „თბილისი მოლში“ გახსნა. 2020 წლის 31 დეკემბრის მდგომარეობით, კომპანია 3 ჰიპერმარკეტს, 10 სუპერმარკეტსა და 27 მცირე ზომის მაღაზიას ფლობდა (2019 წლის 31 დეკემბრის მდგომარეობით 2 ჰიპერმარკეტს, 11 სუპერმარკეტსა და 6 მცირე ზომის მაღაზიას), 2021 წლის 9 დეკემბრის მდგომარეობით ფილიალთა ჯამური რაოდენობა 57-მდეა გაზრდილი.

2020 წელს კარფურმა შემოსავლის 95.5% - 451 მლნ ლარი გაყიდვებიდან მიიღო, 15 მლნ სარეკლამო საქმიანობიდან და პროდუქციის წარდგენიდან.

რაც შეეხება ხარჯებს, შესყიდვების საფასურმა 417 მლნ ლარი შეადგინა, საიდანაც მიწოდებაზე გაკეთებული 44 მლნ-იანი ფასდაკლება გამოიქვითა. სახელფასო ხარჯმა 34 მლნ ლარი შეადგინა, ცვეთისამ - 13 მლნ, იჯარაზე 8 მლნ დაიხარჯა, ტექნიკურ მომსახურებასა და ინვენტარზე - 6.5 მლნ, კომუნალურებზე - 4.7 მლნ, ბანკის საკომისიოზე - 2.6 მლნ, კარფურისთვის გადახდილ ფრანშიზაზე - 2.5 მლნ, რეკლამაზე 2 მლნ, უსაფრთხოების უზრუნველყოფაზე 1.9 მლნ, სათავო ოფისის მომსახურებაზე 1.6 მლნ. უშუალოდ COVID 19-დან დაკავშირებულმა ხარჯებმა კი 813 ათასი ლარი შეადგინა.

2020 წლის 31 დეკემბრის მდგომარეობით კარფურში 2110 ადამიანი იყო დასაქმებული, 2019 წლის 31 დეკემბერს 2303. მიუხედავად იმისა, რომ კომპანიამ 2020 წელს 21 ახალი მაღაზია გახსნა, თანამშრომელთა რაოდენობა 193-ით შეამცირა.

„კარფურის“ პირველი მაღაზია საფრანგეთში 1960 წელს გაიხსნა. დღეს კომპანია 30 სახელმწიფოში 12 200-ზე მეტ სუპერმარკეტსა და ჰიპერმარკეტს ფლობს. 2019 წელს კარფურის შემოსავალმა €81 მლრდ, წმინდა მოგებამ კი €1.3 მლრდ შეადგინა. ქსელი 321 000 ადამიანს ასაქმებს.

„კარფური“ საქართველოში ჰიპერმარკეტის სახით შემოვიდა, მის კონკურენტად ძირითადად გუდვილი განიხილებოდა. შემდგომ წლებში ფილიალების დამატებასთან ერთად კონკურენტთა წრეც გაფართოვდა. „ორ ნაბიჯს“ 2020 წლის 31 დეკემბრის მდგომარეობით 262 სუპერმარკეტი გააჩნდა, კომპანიის შემოსავალმა იმავე წელს 414 მლნ-ს, ხოლო წმინდა მოგებამ 5.4 მლნ-ს მიაღწია. 19%-ით გაზრდილი, 522 მლნ-ანი შემოსავლის მიუხედავად, „ნიკორამ“ 2020 წელი 12.6 მლნ-იანი ზარალით დაასრულა. ნიკორა „ლიბრესა“ და „ნუგეშის“ ქსელის ჯიხურების ჩათვლით 2020 წლის 31 დეკემბრისთვის 345 მაღაზიას ფლობდა. „გუდვილმა“ წელი 137 მლნ-იანი შემოსავლითა და 4.8 მლნ-იანი ზარალით დაასრულა, კომპანია სულ 6 ფილიალითაა წარმოდგენილი საიდანაც 5 ჰიპერმარკეტია, 1 სუპერმარკეტი. რაც შეეხება „სპარს“ მას 2020 წლის 31 დეკემბრის მდგომარეობით 348 მაღაზია გააჩნდა. სპარმა გასულ წელს სპარის შემოსავალი გასულ წელს 39%-ით 292 მლნ ლარამდე გაიზარდა, თუმცა 5.4 მლნ-აინი მოგება 11.3 მლნ ლარიანი ზარალით შეიცვალა.

გიორგი ელიზბარაშვილი