მიუხედავად იმისა, რომ 2022 წლის ეკონომიკური ზრდის პროგნოზი მთავრობამ დააკორექტირა და ზრდის მიმართულებით გაზარდა, 2023 წლის მშპ-ს ზრდის პროგნოზი ისევ უცვლელი დატოვა. 2023 წლის სახელმწიფო ბიუჯეტის კანონპროექტის მესამე ვარიანტში, რომელიც მთავრობამ პარლამენტს 30 ოქტომბერს წარუდგინა, 2023 წლის ეკონომიკური ზრდის პროგნოზი ისევ 5%-ის დონეზეა.

როგორც ბიუჯეტის განმარტებით ბარათშია აღნიშნული, 2022 წლის განახლებული პროგნოზების მიხედვით, რეალური ეკონომიკური ზრდის მაჩვენებელი ნაცვლად 8,5%-ისა, განისაზღვრა 10%-ის ოდენობით. გარდა ამისა, ფაქტობრივი მაჩვენებლების გათვალისწინებით მშპ-ს დეფლატორის მაჩვენებელი 10,5%-იდან შემცირდა 9,5%-მდე.

„ზემოაღნიშნული პარამეტრების ცვლილების, ასევე სტატისტიკის სამსახურის მიერ 2021 წლის ნომინალური მთლიანი შიდა პროდუქტის დაზუსტების გათვალისწინებით, მიმდინარე წლის მთლიანი შიდა პროდუქტის ნომინალური მაჩვენებლის საპროგნოზო მოცულობა განისაზღვრა 72,3 მლრდ ლარის ოდენობით.

2023 წლისთვის ეკონომიკური ზრდისა და მშპ-ს დეფლატორის მაჩვენებლების პროგნოზები არ შეცვლილა და თითოეული მათგანი 5%-ს, ხოლო ნომინალური მთლიანი შიდა პროდუქტი 79,7 მლრდ ლარს შეადგენს“, - აღნიშნულია 2023 წლის ბიუჯეტის განმარტებით ბარათში.

ირკვევა, რომ მიმდინარე წლის განვლილ პერიოდში, საგადასახადო შემოსავლების ფაქტიური მობილიზების გათვალისწინებით, შესაძლებელია აღნიშნული საპროგნოზო მაჩვენებლის ზრდა 500,0 მლნ ლარზე მეტით, რაც საშუალებას იძლევა გაიზარდოს მომდევნო წლისთვის პროგნოზირებული საგადასახადო შემოსავლები 390,0 მლნ ლარზე მეტით.

გარდა საგადასახადო შემოსავლებისა, 2023 წელს განსაზღვრული სესხების დაბრუნების და სხვა შემოსავლების მაჩვენებლები ჯამურად იზრდება 270,0 მლნ ლარით.