2021 წლის ტექნოლოგიური ტრენდების დიდი ნაწილი იყო პანდემიის გამო ცხოვრების ტრანსფორმაციის შედეგი. კორონავირუსზე სწრაფი გამარჯვების იმედი ფუჭი აღმოჩნდა  და, როგორც ჩანს, ის ჯერ კარგა ხანი არ დატოვებს კაცობრიობას. საბოლოო ჯამში ადამიანებს მასთან თანაცხოვრებისთვის ადაპტირება მოუწევთ.

2021 წლის ტექნოლოგიებში 12 ტრენდიდან 3, - ავტომატიზება, განაწილებული წარმოება და ავტონომიური სისტემები, სწორედ პანდემიის გამოძახილია.

ავტონომიურობა დღეს კრიტიკულად მნიშვნელოვანია - ის წარმოების პროცესში ადამიანების მინიმალურ ჩართვას გულისხმობს. ყველა, ვისაც შეუძლია, დისტანციურად უნდა მუშაობდეს. ყველაფერი, რასაც შეუძლია ადამიანის მონაწილეობის გარეშე ფუნქციონირება, ამისთვის მზად უნდა იყოს.

2021 წელს განხორციელდა ან დაიტესტა ბევრი კომერციული უპილოტო პროექტი - მაგალითად, კვების მიწოდების დარგში, რომელიც გარკვეული დროის შემდეგ ადამიანისგან დამოუკიდებელი გახდება.

მსგავსი ექსპერიმენტები ლოკალური ტრანსპორტირების სფეროშიც გაჩნდა - პირველი უპილოტო ტაქსები ჩინეთში და კალიფორნიაში უკვე ამოქმედდა. 2022 წელს უპილოტო სატვირთო გადაზიდვების დაწყებაც იგეგმება, ხოლო Amazon და Walmart ტვირთების მფრინავი უპილოტო აპარატების მეშვეობით ტრანსპორტირებაზე მუშაობენ.

2022 წელს ეს მიმართულება კიდევ უფრო სწრაფად განვითარდება და ჩვენ სხვადასხვა დარგში უამრავ ახალ უპილოტო აპარატს დავინახავთ, რაც საბოლოო ჯამში სატრანსპორტო ინფრასტრუქტურის მნიშვნელოვან შეცვლას გამოიწვევს.

2021 წლის ერთ-ერთი ახალი ტრენდი იყო მარკ ცუკერბერგის მეტასამყაროს იდეა, რომელიც ადრე მხოლოდ კომპიუტერულ თამაშებთან ასოცირდებოდა, დღეს კი გაცილებით უფრო ფართო შინაარსი შეიძინა.

2022 წელს ჩვენ ამ თემაზე უამრავი დისკუსიის მოწმეები გავხდებით. სწრაფი განვითარება ელის ვირტუალური მუზარადების და სათვალეების ბაზარს, რომელსაც დღეს მთლიანად Google და Apple აკონტროლებენ, თუმცა, მასზე აქტიურად შემოდის Meta (Facebook), რომელიც საკუთარ მეტასამყაროს ქმნის და, შესაბამისად, აღჭურვილობის წარმოებასაც გეგმავს.

მომავალში მეტასამყაროს მთავარი მონაწილეები არა მოზარდები და მოთამაშეები, არამედ მენეჯერები, ინჟინრები და საოფისე თანამშრომლები იქნებიან.

სწორედ ამ სეგმენტისთვის ბრძოლა განაპირობებს მეტასამყაროს ტექნოლოგიის სამომავლო განვითარებას. ექსპერტებმა ამ ბაზრის მოცულობა 1 ტრლნ. დოლარად შეაფასეს.

2022 წელს მნიშვნელოვანი ტრენდი იქნება ბრძოლა კლიმატური ცვლილებების წინააღმდეგ, და ამ კუთხით ბევრი სიახლე გველის. მთავრობებმა როგორც იქნა გაიაზრეს გლობალური დათბობის საფრთხეები და სწორედ 2021 წელს რამდენიმე ქვეყანამ ატმოსფეროში მავნე გამონაბოლქვების შემცირების და „დეკარბონიზაციის“ პროგრამა წარადგინა.

„მწვანე“ ტექნოლოგიებში ჩაიდება მილიარდობით დოლარი, მთავრობები კი ტყეების გაჩეხვის შემცირებას, ეკოლოგიურად სუფთა ტრანსპორტის დანერგვას და წიაღისეული საწვავის მოპოვების შემცირებას ფინანსურად წაახალისებენ.

კლიმატურ დღის წესრიგში მსხვილი კორპორაციებიც ჩაერთნენ, ასე რომ, 2022 წელს ეკოლოგიურად სუფთა ტექნოლოგიების კუთხით, ბევრ ახალ ექსპერიმენტს ვნახავთ.

სავარაუდოდ, სწორედ სატრანსპორტო სფერო იქნება სხვადასხვა ახალი ტექნოლოგიების კონცენტრაციის წერტილი, როგორც ავტონომიურობის განვითარების, ასევე ეკოლოგიურად სუფთა ძრავების დამუშავების კუთხით.

ავტორი: თენგიზ აბლოთია

წყარო: forbes