საქართველოს ავიაბაზრის ლიდერობას ორი ავიაკომპანია იყოფს. საქართველოში გადაყვანილი მგზავრთნაკადის მიხედვით ევროპის ერთ-ერთი უმსხვილესი ავიაგადამზიდავი, უნგრული “ლოუქსოტერი” Wizz Air-ი და თურქული ავიაკომპანია Turkish Airlines-ი ბაზრის 13-13%-იანი წილით ლიდერობენ.
ეკონომიკისა და მდგრადი განვითარების სამინისტროს სსიპ სამოქალაქო ავიაციის სააგენტოს ინფორმაციით, 2022 წლის იანვარ-ნოემბერში, რეგულარული და ჩარტერული რეისებით გადაყვანილი მგზავრების რაოდენობით Wizz Air-ი 522983 მგზავრს მოემსახურა, ხოლო Turkish Airlines-ი 502563 მგზავრს.
იანვარ-ნოემბრის მონაცემებით, საქართველოს ავიაბაზრის 9%-იანი წილის მფლობელია და შესაბამისად TOP-5-ში მეორე ადგილზეა თურქული ავიაგადამზიდავი Pegasus Airlines-ი, რომელიც თბილისისა და ბათუმის საერთაშორისო აეროპორტების გავლით 372154 მგზავრს მოემსახურა.
საქართველოს ავიაბაზრის ლიდერთა შორისაა და “საუკეთესო ხუთეულში” მესამე ადგილს 6%-იანი წილით ბელარუსის ავიაკომპანია Belavia იკავებს, რომელიც საანგარიშო პერიოდში საქართველოს ავიაბაზარზე 225602 მგზავრს მოემსახურა. ბაზრის 5-5%-ის მფლობელები და შესაბამისად მეოთხე ადგილზე არიან არაბეთის გაერთიანებული საამიროების ავიაკომპანია flydubai, აზერბაიჯანული ავიაკომპანია AZAL-ი და ისრაელის ავიაკომპანია Israir Airlines-ი.
11 თვის განმავლობაში ქვეყნის აეროპორტების მეშვეობით გადაყვანილი მგზავრთნაკადის მიხედვით მეხუთე პოზიციაზეა და საქართველოს ავიაბაზრის 4%-იან წილს ფლობს საუდის არაბეთის ავიაკომპანია Flynas-ი
რაც შეეხება დანარჩენ ავიაკომპანიებს, გადაყვანილი მგზავრთნაკადის მიხედვით ბაზრის 3-3%-იან წილს იყოფენ ქართული ავიაგადამზიდავი Georgian Airways-ი, ყაზახეთის ავიაკომპანია FlyArystan-ი, არაბეთის გაერთიანებული საამიროების ავიაკომპანია Air Arabia და ისრაელის ავიაკომპანია EL AL.
ბაზრის 2-2%-იან წილს კი ფლობენ შემდეგი ავიაკომპანიები: Lufthansa, Aircompany Armenia, Qatar Airways, Arkia, Air Astana და LOT Polish Airlines.
აღსანიშნავია, რომ 2022 წლის იანვარ-ნოემბერში საქართველოს ავიაბაზარზე მგზავრების 97%-ს უცხოური ავიაკომპანიები მოემსახურნენ, ხოლო დარჩენილ 3%-ს კი ეროვნული ავიაკომპანია.
P.S. აღსანიშნავია, რომ ამა თუ იმ ავიაკომპანიისთვის პროცენტული მაჩვენებლის კლება ან მატება დამოკიდებულია კონკრეტულ წელს არსებულ საერთო მგზავრთნაკადზე და საანგარიშო პერიოდში კონკრეტული ავიაკომპანიის მიერ გადაყვანილი მგზავრების რაოდენობაზე. მგზავრთნაკადის რაოდენობის ცვლილების ფონზე, წლიდან წლამდე ამა თუ იმ კომპანიის წინა წილის კორექტირება ხდება.