ხელისუფლება 2022 წლის სახელმწიფო ბიუჯეტში პანდემიის მართვისთვის საჭირო თანხას ამცირებს. სახელმწიფო ხაზინის პირველადი პროექტის თანახმად, კოვიდ 19-თან დაკავშირებული ხარჯები 310 მლნ ლარითაა შემცირებული.

276 მილიონი ლარით იკლო მოსახლეობის ჯანმრთელობის დაცვისთვის განსაზღვრულმა დაფინანსებამაც.

ხელისუფლება ჯანდაცვის სექტორის დაფინანსების სეკვესტრს ახლა დასტაბილურებული ეპიდემიოლოგიური მდგომარეობით ხსნის, თუმცა ოპოზიციაში კითხვები არა მხოლოდ მომავალი წლის ფინანსებზე არამედ ჯანდაცვის სექტორის მიმდინარე წლის ხარჯებზეც აქვთ, რომელიც ამ დრომდე არ გასაჯაროებულა და თანხების არამიზნობრივი ხარჯვა იკვეთება. 

2022 წლის სახელმწიფო ბიუჯეტის პროექტი მომავალი წლისთვის მთლიანი შიდა პროდუქტის 6%-იან ზრდას ითვალისწინებს. ბიუჯეტის დეფიციტი დაგეგმილია 4, 4%- იან ზრდაზე. თუ 2021 წელს ეკონომიური ზრდის მაჩვენებელი მთავრობას 7,7 პროცენტზე ჰქონდა დაგეგმილი, წლის ბოლოს ეს პარამეტრი 9,5 პროცენტითაა ასახული, ხოლო 2022  წლის ეკონომიკური ზრდის მაჩვენებელი კი 6 პროცენტზეა გათვლილი.   წელს სახეზე გვაქვს ბიუჯეტის 6,9 პროცენტიანი დეფიციტი, რომლის შემცირებაც 2022 წელს 6, 6 პროცენტამდე არის ნავარაუდევი.  ნაერთი ბიუჯეტის შემოსავლები იზრდება და არის 15 მლრდ 193 მლნ ლარი. დეფიციტის შემცირება ითვალისწინებს ვალის შემცირებასაც. ვალის მაჩვენებელი მიმდინარე წელს 61 პროცენტს შეადგენდა, რაც ფინანსთა მინისტრის მოადგილის განმარტებით კრიტიკული ზღვარია. 2022 წლის ბიუჯეტის პროექტის მიხედვით, საბიუჯეტო ვალის მაჩვენებელი პანდემიამდე არსებულ პარამეტრს, 40 პროცენტიან ნიშნულს უნდა დაუახლოვდეს.

ბიუჯეტის პირველად ვერსიაში ასახულია ის ვალდებულებები, რაც აღებული აქვს სახელმწიფოს. თანხების გადანაწილება სამი მნიშვნელოვანი მიმართულებით, ჯანდაცვის, ეკონომიკური და საბიუჯეტო დეფიციტის შემცირების კუთხით არის განსაზღვრული. ბიუჯეტში გათვალისწინებულია პენსიების ინდექსაციასთან დაკავშირებით საკანონმდებლო ინიციატივა, რომელიც, შესაბამისი ასაკობრივი ჯგუფებისთვის პენსიების 20 და 25 ლარით ზრდას ითვალისწინებს. ჯანდაცვის პროგრამებისთვის 500 მილიონი ლარია გათვალისწინებული. საყოველთაო ჯანდაცვის მიმართულებით-820 მილიონი ლარი. გაზრდილია რეგიონული განვითარებისა და ინფრასტრუქტურის სამინისტროს დაფინანსება და შეადგენს 2 მლრდ 844 მლნ ლარს.

განათლების მიმართულებით, ბიუჯეტი 1 იანვრიდან საჯარო სკოლების პედაგოგთა ხელფასების 100 ლარით ზრდას ითვალისწინებს. ბიუჯეტით ასევე განსაზღვრულია სოციალური მუშაკების ხელფასების ზრდა. ფინანსთა სამინისტროს ინფორმაციით, მიმდინარეობს მუშაობა, რათა გამოინახოს რესურსი საბიუჯეტო სექტორში დასაქმებულთა სახელფასო ანაზღაურების გასაზრდელად. დიასპორული პოლიტიკის განსახორციელებლად 1მლნ. 200 ათასი ლარია გათვალისწინებული, რაც შესაბამისად საგარეო საქმეთა სამინისტროს ბიუჯეტშია ასახული.

ბიუჯეტის პარამეტრები გადაიხედება დოკუმენტის საბოლოო ვარიანტის მომზადებისას. 2022 წლის ბიუჯეტის პირველადი ვერსიის საკომიტეტო განხილვების შემდეგ, საფინანსო-საბიუჯეტო კომიტეტის შემაჯამებელი სხდომა 18 ოქტომბერს გაიმართება.

ავტორი ბელა გელაშვილი

წყარო: mtavari.tv,  ფინანსთა სამინისტრო