სამშენებლო ბიზნესისთვის მიმდინარე წელი, როგორც გაყიდვების, ასევე ფასის მხრივ საკმაოდ მზარდია. როგორც „კომერსანტთან“ საუბრისას სამშენებლო კომპანიის „აპექს დეველოპმენტის“ დამფუძნებელმა და დირექტორმა ვლადიმერ რობაქიძემ აღნიშნა, 2022 წელს ბინის ფასები წინა წელთან შედარებით 20% - ით, ხოლო გაყიდვები 40-დან 45%-მდე არის გაზრდილი და ძირითადი მოთხოვნა 60-65 კვ.მ ფართობის ბინებზეა.

რობაქიძე ამბობს, რომ მოთხოვნის ზრდა განპირობებულია, ბინის ქირაზე ფასის ზრდით, შესაბამისად მომხმარებელი ცდილობს, რომ ინვესტიცია უძრავ ქონებაში ჩადოს.

„წინა წელთან შედარებით, დაახლოებით 40%-დან 45%-მდე გაგვეზარდა გაყიდვები, ჩვენი კომპანია 10 წელიწადია ბაზარზეა და ვაშენებთ მრავალბინიან შენობებს და  ძირითადად მშენებარე ბინებს ვყიდით. სანამ პროექტი დასრულდება, ბინები უკვე გაყიდულა. ძირითადი მოთხოვნა 60-65 კვ.მ ბინებზეა, არის მოთხოვნა დიდ ფართებზეც, თუმცა შედარებით ნაკლები.

რაც შეეხება ფასებს, ბინები დაახლოებით 20%-ით გაძვირდა, მე ვფიქრობ, ამის მიზეზი ლარის გამყარებაა, ეროვნული ვალუტა საკმაოდ გამყარდა. მეორე ფაქტორი კი მსოფლიოში მიმდინარე მოვლენებია.

გამომდინარე იქიდან, რომ საქართველოში ბინის დაქირავებაზე ფასი გაზრდილია, ადამიანებმა, რომლებიც ამ ბიზნესში არიან ჩართულები, უძრავ ქონებაში თანხის ინვესტირება გადაწყვიტეს და სავარაუდოდ, მყიდველების 60-70%, სწორედ ეს სეგმენტია“, - აღნიშნა ვლადიმერ რობაქიძემ.

რობაქიძის  თქმით, „აპექს დეველოპმენტში“ უცხო ქვეყნის მოქალაქეებს მიერ ბინების შესყიდვა არ ხდება, რადგან როგორც რობაქიძე ამბობს, საქართველოში საცხოვრებლად ჩამომსვლელებს უკვე გამზადებულ ბინაში სურთ შესვლა.

„აჟიოტაჟია ატეხილი იმაზე, რომ რუსეთიდან შემოსული მოსახლეობა  ყიდულობს ბინებს,  ჩვენ ეგ შემთხვევა არ გვქონია, ალბათ იმიტომ, რომ მათ უფრო მზა პროექტი სჭირდებათ, ჩვენ ვყიდით მშენებარეს, შესაბამისად ასეთი მომხმარებელი არ გვყავს“, - აღნიშნა ვლადიმერ რობაქიძემ.

რობაქიძე, ზოგადად სამშენებლო ბიზნესის და „აპექს დეველოპმენტის“ გამოწვევად კადრების დეფიციტს ასახელებს, მისი თქმით, მიუხედავად იმისა, რომ სამშენებლო სექტორში სახელფასო განაკვეთი საკმაოდ გაზრდილია, კადრების დეფიციტის პრობლემა მაინც მწვავედ დგას. 

„ჩვენი კომპანიის და ზოგადად, სამშენებლო ბიზნესის ერთ-ერთი გამოწვევა კადრების დეფიციტია, ის ხალხი, ვინც ჩვენთან იყო დასაქმებული, მიუხედავად  იმისა, რომ საკმაოდ  გავზარდეთ  მომსახურების  ღირებულებები, მაინც გამოგვაკლდა, დეფიციტი საკმაოდ  დიდია. ჩვენი კომპანია პანდემიის მერე ძალიან  სწრაფად  გაიზარდა, პროექტების მასშტაბით დაახლოებით 110% -  იანი ზრდა გვაქვს,  თუ პანდემიამდე წლის განმავლობაში 50  000-დან 70 000 კვადრატულ მეტრამდე ვაშენებდით, წელს ეს რიცხვი 150 000 კვადრატული მეტრია, შესაბამისად დაგვჭირდა კადრების დამატება  და საკმაოდ  მძიმე  მდგომარეობაში ვართ. კადრების დეფიციტი  ბაზარზე ძალიან  დიდია, რაშიც დიდ როლს ქვეყნიდან გადინება ასრულებს“, - აღნიშნა ვლადიმერ რობაქიძემ.

„აპექს დეველოპმენტისთვის“ მიმდინარე  წელი ახალი პროექტებითაც იყო გამორჩეული, კომპანიამ ნაძალადევში და ქეთევან წამებულის გამზირზე 2 პროექტი დაასრულა ასევე დაიწყო ახალი პროექტი ლისზე, რომელიც 4 კორპუსისგან შედგება და ნუცუბიძეზე.

რაც შეეხება 2023 წელს, რობაქიძე დადებით პროგნოზს აკეთებს და ფიქრობს, რომ სფეროსთვის 2023 კარგი წელი იქნება, მისი თქმით, უკვე გამოკვეთილია უძრავ ქონებაზე მზარდი მოთხოვნა, შესაბამისად „აპექს დეველოპმენტი“ მომხმარებელს ახალ პროექტებს ისანსა და ავლაბარში შესთავაზებს. რობაქიძე ვარაუდობს, რომ ბინის ფასის 10-15% იანი ზრდა გაგრძელდება.

თაკო კვაჭანტირაძე