Galt & Taggart-ის მიერ განახლებული კვირის მიმოხილვის მიხედვით, 2021 წლის სექტემბერში ტურისტების რიცხვმა 2019 წლის სექტემბრის დონის 39% შეადგინა, რაც გაუმჯობესებული მაჩვენებელია 2021 წლის ზაფხულის სეზონის აღდგენის დინამიკასთან შედარებით (აღნიშნულ პერიოდში საშუალოდ 33%-იან აღდგენას ჰქონდა ადგილი 2019 წლის დონესთან შედარებით).

აღსანიშნავია, რომ წინა თვეების მსგავსად, 2021 წლის სექტემბერში ტურიზმის შემოსავლები უფრო სწრაფად აღდგა, ვიდრე ვიზიტორების რაოდენობა და 2019 წლის სექტემბრის შემოსავლების 50.8% შეადგინა. შემოსავლების უფრო სწრაფი აღდგენის მთავარი მიზეზია ის, რომ ვიზიტორების ნაკადებში ტურისტები ჭარბობენ, რომლებიც ერთდღიან ვიზიტორებთან შედარებით ბევრად მეტს ხარჯავენ (აღსანიშნავია, რომ მას შემდეგ, რაც ტურიზმის აღდგენა დაიწყო 2021 წლის აპრილიდან, ტურისტების რაოდენობა საშუალოდ 2019 წლის დონის 30%-ს შეადგენს, ხოლო იმავე პერიოდში ერთდღიანი ვიზიტორები საშუალოდ 2019 წლის მხოლოდ 5%-ის ნიშნულზეა და შესაბამისად შემოსავლები უფრო სწრაფად აღდგა).

მიმოხილვის მიხედვით, 2021 წლის სექტემბერში 226.7 ათასი საერთაშორისო ვიზიტორი (+348.8% წ/წ) მოგზაურობდა საქართველოში და ყველაზე მეტი ვიზიტორი შემოვიდა რუსეთიდან (14.6% წილი ჯამურ ვიზიტებში), რასაც მოჰყვება თურქეთი (14.2% წილი) და უკრაინა (10.1% წილი). ამასთან, ვიზიტორთა უმრავლესობა საქართველოში შემოვიდა საავტომობილო ტრანსპორტით (58.1% წილი), რასაც მოჰყვა საჰაერო გზით შემოსვლა (40.8% წილი). ჯამურად 2021 წლის იანვარ- სექტმბერში, საქართველოს 1.2 მილიონი საერთაშორისო ვიზიტორი ეწვია (-13.2% წ/წ, 2019 წლის დონის 19.9%) და ტურიზმის შემოსავლებმა 865.8 მლნ აშშ დოლარი შეადგინა (+73.5% წ/წ, 2019 წლის დონის 33.5%).

გარდა ამისა, 2021 წლის სექტემბერში ექსპორტი წლიურად 12.8%-ით გაიზარდა 373.6 მლნ აშშ დოლარამდე, გასული წლის მაღალი ბაზიდან. ამასთან, ექსპორტი მნიშვნელოვნად, 22.3%-ით არის გაზრდილი 2019 წლის სექტემბრის დონესთან შედარებით. სექტემბერში იმპორტი წლიურად 23.4%-ით გაიზარდა 925.8 მლნ აშშ დოლარამდე (+15.1% 2019 წლის სექტემბერთან შედარებით), რაც ძირითადად ნავთობპროდუქტების იმპორტის ზრდამ განაპირობა. შედეგად, სავაჭრო დეფიციტი წლიურად 31.8%-ით გაიზარდა სექტემბერში.

2021 წლის სექტემბერში სპილენძი (-32.4% წ/წ), ფეროშენადნობები (+46.4% წ/წ), მანქანები (+44.9% წ/წ), თხილი (+24.6% წ/წ) და ღვინო (+22.0% წ/წ) იყო ტოპ 5 ექსპორტირებული საქონელი. ამასთან, ექსპორტის 14.9% ევროკავშირზე მოდიოდა (-5.9% წ/წ), 48.0% დსთ-ზე (+23.1% წ/წ) და 37.1% სხვა ქვეყნებზე (+9.7% წ/წ). 2021 წლის სექტემბერში ტოპ 5 იმპორტი იყო სპილენძი (-18.6% წ/წ), ნავთობი (+102.9% წ/წ), მანქანები (-8.1% წ/წ), მედიკამენტები (+9.8% წ/წ) და გამომთვლელი მანქანები (+455.7% წ/წ).

ჯამურად, 2021 წლის პირველ 9 თვეში, სავაჭრო ბალანსი წლიურად 19.9%-ით გაუარესდა და 4.0 მლრდ აშშ დოლარი შეადგინა, რადგან ექსპორტი 24.0%-ით გაიზარდა 3.0 მლრდ აშშ დოლარამდე (+9.0% 2019 წლის პირველ 9 თვესთან შედარებით), ხოლო იმპორტი 21.6%-ით გაიზარდა 7.0 მლრდ აშშ დოლარამდე (+3.3% 2019 წლის პირველ 9 თვესთან შედარებით).

მიმოხილვაში აღნიშნულია, რომ 2021 წლის სექტემბერში მწარმოებელთა ფასების ინდექსი წლიურად 16.8%-ით გაიზარდა, წინა თვის 16.4%-იანი ზრდის შემდეგ. ინდექსის ფორმირებაზე ძირითადი ზეგავლენა იქონია ფასების ცვლილებამ შემდეგ სექციებში: დამამუშავებელი მრეწველობა (+19.5%) და ელექტროენერგია, აირი და კონდიცირებული ჰაერი (+11.4%).