COVID-19-ის პანდემიის პირველ წელს, როდესაც სხვადასხვა ქვეყნებმა საზღვრები ჩაკეტეს, კოკაინის წარმოება მნიშვნელოვნად გაიზარდა. განცხადება გაეროს ნარკოტიკებთან და დანაშაულთან ბრძოლის ოფისმა (UNODC) 16 მარტს გააკეთა. 2021 წელს მცენარე კოკას - კოკაინის მთავარი ინგრედიენტის წარმოება - 2020 წელთან შედარებით 35%-ით გაიზარდა და პანდემიამდელ დონეს გადააჭარბა. ეს ყველაზე ძლიერი ზრდაა 2016 წლის შემდეგ. მოხსენებაში ნათქვამია, რომ კოკას კულტივირებისთვის გამოყენებული მიწის ფართობი 2021 წელს 40%-ით გაიზარდა და 204 000 ჰექტარს მიაღწია. ინფორმაციას cbsnews-ი აქვეყნებს.

UNODC-ის თანახმად, კოლუმბიური ნარკოკარტელები - კოკაინის მთავარი მწარმოებლები მსოფლიოში - აუმჯობესებენ როგორც წარმოების, ასევე ტრანსპორტირების მეთოდებს. კოკაინს ხშირად ამზადებენ ჯუნგლების ლაბორატორიებში. ნარკოტიკების მოპოვების მეთოდები უფრო ეფექტური ხდება და წარმოება უფრო ფართო მასშტაბებს იძენს. 2021 წელს სხვადასხვა ქვეყნის ხელისუფლებამ რეკორდული 2 000 ტონა კოკაინი ამოიღო. ტრანსპორტირებისთვის სხვადასხვა მეთოდი გამოიყენებოდა - კერძოდ, კოკაინი აღმოაჩინეს ავოკადოს, სამედიცინო ნიღბებისა და კალმარის ყუთებში. UNODC-ი ასევე აღნიშნავს, რომ ნარკომოვაჭრეები კონტროლის გვერდის ავლისთვის მუდმივად ახალ გზებს ეძებენ და სულ უფრო ხშირად შედიან ახალ ბაზრებზე, როგორიცაა აზია და აფრიკა. მოხმარება იზრდება თვით სამხრეთ ამერიკაშიც, თუმცა ევროპასა და ჩრდილოეთ ამერიკაზე კოკაინის მოხმარების ისევ 3/4 მოდის.