პანდემიურ პერიოდში მცირე და საშუალო ინტერნეტპროვაიდერი კომპანიების სერვისებზე მოთხოვნამ მოიმატა. კორონავირუსთან დაკავშირებული რიგი გამოწვევების მიუხედავად, სექტორის საქმიანობა აშკარად პოზიტიური აღმოჩნდა. მცირე და საშუალო ოპერატორების ასოციაციის ხელმძღვანელის უჩა სეთურის შეფასებით, ზრდადია როგორც პროვაიდერების რაოდენობა, ასევე მიწოდებული ინტერნეტის ხარისხი, რომელიც სამომავლოდ კიდევ გაუმჯობესდება.

სეთურის ინფორმაციით, მცირე და საშუალო კომპანიების ფიქსირებულ აბონენტებს ბაზრის 12% უჭირავთ. რაც შეეხება ტარიფს, აღნიშნული სეგმენტის მომსახურების საფასური თვეში საშუალოდ 20-25 ლარის ფარგლებშია.

,,მცირე და საშუალო ოპერატორების საქმიანობაში პიკი იყო 2020 წელი, როცა ეპიდემიის გამო ყველა სახლში იჯდა და ონლაინ მუშაობდა. სექტორისთვის არც დღეს არსებული მოცემულობა წარმოადგენს პრობლემას და მზად არიან ნებისმიერი გამოწვევისთვის, რაც შეიძლება პანდემიის გამო მოთხოვნის ზრდას უკავშირდებოდეს.  2021 წლის მდგომარეობით, სერვისებზე მოთხოვნაც და შემოსავლებიც  საშუალოდ 15-16%-ით გაზრდილია. ხარისხი მასობრივად გაუმჯობესდა და ამ მხრივ რეგიონებსა და დედაქალაქს შორის დიდი სხვაობა არ არის.  ამასთან,  ვმუშაობთ ახალ პროექტზე, ხარისხი სამომავლოდ უფრო მეტად დაიხვეწება და რადიკალურად განსხვავებულ შედეგს მივიღებთ.  ოპტიკებისა და რადიოს შემთხვევაში, სიმძლავრები განსხვავებულია, თუმცა ჩვენი მომსახურება მოიცავს ისეთი სერვისებს, როგორიცაა დაზიანებების აღმოფხვრა, რეაგირება და სხვა, რა მხრივაც ლიდერები ვართ“, - აცხადებს უჩა სეთური.

სექტორის მთავარ გამოწვევად იგი მონოპოლისტი კომპანიების მხრიდან კანონის აღსრულებას მიიჩნევს და ამბობს, რომ  ბაზარზე არაკონკურენტუნარიანი პირობებია, რაც მათი საქმიანობის შედეგზე ნეგატიურად აისახება.

,,სიმძლავრეები გაზრდილია და ხარისხის მხრივ წინ მივდივართ, რაც კარგია. თუმცა არის დიდი კომპანიების მხრიდან დემპინგი, თვითღირებულებაზე უფრო დაბალ ფასად სთავაზობენ სერვისებს მომხმარებელს. მაგალითისთვის, როცა ინტერნეტი და ტელევიზია თბილისში ღირს, დავუშვათ, 49 ლარი, ანალოგიური შეთავაზება რეგიონებში შეიძლება 28 ლარი ღირდეს. ცხადია, ასეთი ტარიფი მომხმარებლისთვის მისაღებია, მაგრამ ჩვენ სერიოზულ დაბრკოლებას გვიქმნის. კონკურენციის დიდი პრობლემაა. მართალია, მსხვილი ოპერატორები თავიანთ გადაწყვეტილებას ამართლებენ იმით, რომ დროებითი შეთავაზებაა და აქციის სახეს ატარებს, მაგრამ არაფერი იცვლება და ხშირად იაფი სერვისი ძალაში რჩება, რაც საშუალო და წვრილი ოპერატორების საქმიანობაზე ნეგატიურად აისახება. მით უმეტეს, ისეთი რეგიონები აქვთ შერჩეული, სადაც ისინი ჩვენი სეგმენტს მსხვილი ოპერატორების კონკურენტებად მოიაზრებენ. ასეთ შემთხვევაში სხვა რეგიონებთან და თბილისთან შედარებით, მომხმარებელს ნაკლებ ფასს სთავაზობენ“, - ამბობს უჩა სეთური.

ცნობისთვის, ამ ეტაპზე მცირე და საშუალო ინტერნეტპროვაიდერი ოპერატორების რაოდენობა საქართველოში ჯამში 150-ს აღწევს. მათი მომხმარებლების რაოდენობა 120 000-ის ფარგლებშია.

მარი ჩიტაია