2021 წელს, 2020 წელთან შედარებით, გარდაცვლილთა რიცხოვნობა 18.5 პროცენტით გაიზარდა და 59 906 ერთეული შეადგინა, მათ შორის 30 156 კაცი და 29 750 ქალი. აღნიშნულის შესახებ საუბარია საქსტატის მიერ გამოქვეყნებულ პუბლიკაციაში.
სტატისტიკის ეროვნული სამსახურის 2021 წლის მონაცემებით, მოკვდაობის ზოგადმა კოეფიციენტმა (გარდაცვლილთა რიცხოვნობა ყოველ 1 000 კაცზე) შეადგინა 16.2 პრომილე.
ისევე როგორც დაბადების შემთხვევაში, 2021 წელს გარდაცვალების ყველაზე მეტი შემთხვევა დაფიქსირდა ქ. თბილისში (29.9%), ხოლო ყველაზე ნაკლები – რაჭა-ლეჩხუმისა და ქვემო სვანეთის რეგიონში (1.5 %).
2021 წელს 413 ჩვილი (1 წლამდე ასაკის ბავშვი) გარდაიცვალა. ამასთან ჩვილ ბავშვთა მოკვდაობის კოეფიციენტი (1 წლამდე გარდაცვლილთა რაოდენობა 1 000 ცოცხლად დაბადებულზე) 2011 წელთან შედარებით 4.8 პუნქტით შემცირდა და 9.0 პრომილე შეადგინა. 1 წლამდე ასაკის გარდაცვლილებში ყველაზე დიდი წილი ნეონატალურ (დაბადების მომენტიდან სიცოცხლის 28-ე დღემდე) პერიოდზე მოდის.
საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს მონაცემებით, 2021 წელს საქართველოში გარდაცვლილ დედათა რიცხოვნობამ 34 შეადგინა, ხოლო დედათა სიკვდილიანობის კოეფიციენტმა (100 000 ცოცხლად დაბადებულზე) – 31.8. უნდა აღინიშნოს, რომ 2021 წელს გარდაცვლილ 34 დედათაგან 24 შემთხვევაში გარდაცვალება უკავშირდება ახალი კორონავირუსით გამოწვეულ დაავადებებს.
საქსტატის ინფორმაციით, 2021 წლის მდგომარეობით საქართველოში გარდაცვალების მიზეზებს შორის დომინირებს სისხლის მიმოქცევის სისტემის დაავადებები (37.0 პროცენტი), კორონავირუსით გამოწვეული დაავადება (18.8 პროცენტი) და სიმსივნეები (12.8 პროცენტი).
გარდაცვალების მიზეზები განსხვავდება ასაკისა და სქესის მიხედვით. 5 წლამდე ასაკში გარდაცვალების 3 ძირითად მიზეზს წარმოადგენს პერინატალურ პერიოდში განვითარებული ზოგიერთი მდგომარეობა, თანდაყოლილი ანომალიები, დეფორმაციები და ქრომოსომული დარღვევები და უბედური შემთხვევები.
5-14 წლის ასაკში გარდაცვალების მიზეზებს შორის ჭარბობს უბედური შემთხვევები და ავთვისებიანი სიმსივნეები ორივე სქესისთვის. ბიჭებისთვის ასევე დიდ წილს იკავებს ნერვული სისტემის და გრძნობის ორგანოების სხვა ავადმყოფობები (10.4 პროცენტი), ხოლო გოგონებისთვის − ენდოკრინული სისტემის, კვებისა და ნივთიერებათა ცვლის დარღვევით გამოწვეული ავადმყოფობები (14.3 პროცენტი).
2021 წელს 15-69 წლის ასაკში გარდაცვალების მიზეზებში ჭარბობს ავთვისებიანი სიმსივნეები და ახალი კორონავირუსით გამოწვეული დაავადება ორივე სქესისთვის. ასევე, კაცებს შორის დიდ წილს იკავებს გულის იშემიური ავადმყოფობები (10.4 პროცენტი), ხოლო ქალებს შორის - ცერებროვასკულური ავადმყოფობები (8.3 პროცენტი).
70 წლის და უფროსი ასაკის მოსახლეობაში, როგორც მოსალოდნელია, გულის და სისხლის მიმოქცევის სისტემის დაავადებებთან ერთად ჭარბობს ახალი კორონავირუსით გამოწვეული დაავადება.
საქსტატი
