2020 წელს საქართველოში საფინანსო მომსახურების საქმიანობით დაკავებული საწარმოების დეკლარირებულმა შემოსავლებმა 5860,9 მლნ. ლარი შეადგინა. ამის შესახებ ინფორმაციას „საქსტატი“ აქვეყნებს. აქედან უდიდესი ნაწილი (76,6%) მიეკუთვნება საპროცენტო და მასთან გათანაბრებულ შემოსავლებს, 8,8% მოდის საკომისიოებზე, ხოლო დარჩენილი 14,6% სხვა სახის შემოსავლებზე ნაწილდება.

საფინანსო საქმიანობით დაკავებული საწარმოების გამოკვლევის შედეგების მიხედვით, 2020 წლის დასასრულისთვის საფინანსო მომსახურების საქმიანობით დაკავებული საწარმოების სალაროში განთავსებული იყო 2178,0 მლნ. ლარი ნაღდი ფულის სახით. 2020 წლის ბოლოსთვის ფიქსირებული და არაწარმოებული აქტივების ნარჩენმა (საბალანსო) ღირებულებამ 1779,2 მლნ. ლარი შეადგინა. 2020 წელს საფინანსო მომსახურების საქმიანობით დაკავებულ საწარმოებში დასაქმებულთა საშუალო წლიური რაოდენობა შეადგენდა 36 000 კაცს, რომელთაგან 61,1% ქალი იყო.

2020 წელს სადაზღვევო კომპანიების მიერ (პირდაპირი დაზღვევის საქმიანობის მიხედვით) გამომუშავებულმა პრემიამ (ბრუტო) 620,2 მლნ. ლარი შეადგინა, საიდანაც 40% სამედიცინო (ჯანმრთელობის) დაზღვევაზე მოდის, 16% - ქონების დაზღვევაზე, 7,9% - სიცოცხლის დაზღვევაზე, 6,1% - სახმელეთო ტრანსპორტის გამოყენებასთან დაკავშირებულ სამოქალაქო პასუხისმგებლობის დაზღვევაზე, 1,8% - უბედური შემთხვევის დაზღვევაზე, ხოლო დანარჩენი (28,2%) სხვა სახის დაზღვევაზე ნაწილდება.

2020 წელს სადაზღვევო კომპანიების მიერ დამდგარი სადაზღვევო ზარალი (ბრუტო) 378,7 მლნ. ლარით განისაზღვრა, რომლის 51,9% სამედიცინო (ჯანმრთელობის) დაზღვევაზე მოდის, 14,1% - ქონების დაზღვევაზე, 5,7% - სიცოცხლის დაზღვევაზე, 2,9% - სახმელეთო ტრანსპორტის გამოყენებასთან დაკავშირებულ სამოქალაქო პასუხისმგებლობის დაზღვევაზე, 0,2% - უბედური შემთხვევის დაზღვევაზე, ხოლო დანარჩენი (25,2%) სხვა სახის დაზღვევაზე ნაწილდება.