ზაფხულსა და შემოდგომაზე ჯამში 70 კმ საერთაშორისო მაგისტრალი გაიხსნება, - ამის შესახებ პრემიერ-მინისტრმა, გიორგი გახარიამ პარლამენტის პლენარულ სესიაზე, ყოველწლიური მოხსენებით სიტყვით გამოსვლისას განაცხადა.
„2019 წელს რეკორდული, 804 კმ. გზის რეაბილიტაცია და პერიოდული შეკეთება მიმდინარეობდა ერთდროულად. დღეის მდგომარეობით მიმდინარეობს 140 კმ საერთაშორისო მნიშვნელობის ახალი მაგისტრალური გზის მშენებლობა, საიდანაც 2020 წლის ბოლომდე გაიხსნება ჯამში 70 კმ საერთაშორისო მაგისტრალი და ესენია: ქუთაისის შემოვლითი გზის დამატებითი ორი ზოლი, ხაშურის შემოვლითი გზა, სამტრედია-გრიგოლეთის, ჯაპანა-ლანჩხუთის მონაკვეთი. გზის ეს მონაკვეთები ზაფხულის და შემოდგომის განმავლობაში გაიხსნება. მიმდინარეობს რიკოთის მონაკვეთზე აქტიური მუშაობა და ამას ხედავენ ჩვენი მოქალაქეები ყოველ დღე“, - განაცხადა გახარიამ.
მისი განცხადებით, ეკონომიკა რჩება ჩვენი ქვეყნის უმთავრეს პრიორიტეტად.
„როდესაც ჩვენ ვამბობთ, რომ ქვეყნის უსაფრთხოება, მართლწესრიგი, შიდა უსაფრთხოება არის გარანტირებული, ჩვენ რა თქმა უნდა გვაქვს შესაძლებლობა იმაზე რომ ვისაუბროთ ეკონომიკის შემდგომ განვითარებაზე. საბოლოო ჯამში ეს დადის თითოეულ ჩვენს მოქალაქემდე და სიღარიბის დაძლევამდე. საქართველოს ეკონომიკური პოლიტიკის ფუნდამენტი და ხერხემალი არის ძლიერი კერძო სექტორი, რომელიც ქმნის დამატებით ახალ სამუშაო ადგილებს რომელიც არის ერთადერთი ინსტრუმენტი სიღარიბის დასაძლევად. ეს არის ჩვენი ეკონომიკური პოლიტიკის განმსაზღვრელი და თავის მხრივ სამუშაო ადგილების შექმნა არის ერთადერთი საშუალება სწრაფად და ეფექტურად სიღარიბის დაძლევის“, - განცხადა გიორგი გახარიამ.
მისი თქმით, ეკონომიკური პოლიტიკის ყველაზე განმსაზღვრელი არის მაკრო-ეკონომიკური სტაბილურობა.
„ისე როგორც შეუძლებელია ეკონომიკის განვითარებაზე საუბარი, თუ ქვეყანაში არ არის სიმშვიდე და სტაბილურობა, შეუძლებელია ეკონომიკის განვითარებაზე ვისაუბროთ თუ ქვეყანაში არ არის მაკრო-ეკონომიკური სტაბილურობა. ეს არის ფუნდამენტი, რომელზეც ჩვენ შემდგომ შეგვიძლია ვისაუბროთ ბიზნესის და სხვა სფეროების განვითარებაზე“, - აღნიშნა პრემიერ-მინისტრმა.
საქართველოს პარლამენტში მთავრობის მეთაურს უსმენენ. პრემიერის მოსმენით დღეს, პარლამენტში საგაზაფხულო სესია დასრულდება. რეგლამენტის შესაბამისად, თვის ბოლო პარასკევს, სესია იხურება.