„ორ თვეში ჩინეთის ბაზარზე ჩანთების კოლექციით გავდივართ,“-ამის შესახებ „კომერსანტს „გეფერინის“ დამფუძნებელმა ილია გეფერიძემ განუცხადა.
ჩანთების ქართული ბრენდი, ჩინეთის ბაზართან აქტიურ მოლაპარაკებებს რამდენიმე თვეა აწარმოებს, თუმცა, მაშინ ექსკლუზიურად გაყიდვაზე მოლაპარაკების ხელშეკრულება კორონავირუსის გამო შეწყდა. მიუხედავად ამისა, მხარებს შორის ორმხრივი შეთანხმება განახლდა და ჩინეთის ბაზარზე „გეფერინს“ ჯერ ჩანთების, ხოლო დეკემბერში ფეხსაცმლის კოლექციით ვიხილავთ.
„პირველი გასვლა ჩანთების კოლექციით იქნება. ჩანთის 250-მდე აქტიური მოდელი გვაქვს, პირველ ეტაპზე სატესტოდ 50-მდე აქტიურ მოდელს გავაგზავნით და იქაური ონლაინ მაღაზიების დახმარებით დაიწყება გაყიდვები. შემდეგ ბაზარი და მოთხოვნა გვიჩვენებს როგორ უნდა მოვიქცეთ. რაც შეეხება ფეხსაცმელს, სექტემბრის შემდეგ აქტიურად ვაწარმოებთ. ეს არის ჩვენი დამატებითი პროდუქტი და ამ მიმართულებით მეტად განვითარებას ვაპირებთ. თუმცა მასზე ისეთი მოთხოვნა არ არის როგორც ჩანთებზე. მიუხედავად ამისა, დეკემბრისთვის ფეხსაცმლის ჩინეთის ბაზარზე გატანას ვფიქრობთ, მანამდე გვინდა, რომ ბაზარმა ჩანთებით გაგვიცნოს,“-განაცხადა ილია გეფერიძემ.
„კომერსანტთან“ საუბარში გეფერიძე კორონავირუსის გამო გაჩერებულ წარმოებაზეს ამახვილებს ყურადღებას. მისი თქმით, როგორც ყველა კომპანია, მათი წარმოებაც შეჩერებული იყო და ნივთებს მხოლოდ ონლაინ პლატფორმით აწვდიდა მომხმარებელს.
„26 მაისიდან გავხსენით საწარმო და 1 ივნისიდან მაღაზიები. ამ პერიოდში მხოლოდ ონლაინ გაყიდვები გაიზარდა და სამომავლოდ პლატფორმის კიდევ უფრო განვითარებას ვგეგმავთ. რაც შეეხება მუშაობის განახლებას და იმას თუ რა დაგვხვდა ადგილზე მისულებს, მიჭირს ჯერ რაიმეს განსაზღვრა. სამი თვე მაინც უნდა დავაკვირდეთ ბაზარს, როგორ განვითარდება მოვლენები და ჩვენ როგორც ბიზნესი რა ადგილზე ვართ ფინანსურად,“-აღნიშნა გეფერიძემ და იმაზეც გაამახვილა ყურადღება, რომ ბიზნესი მთავრობის დახმარებას ელოდება, რომელიც საგრანტო პროგრამას მოიაზრებს.
ნათია ლომიძე