„2020 წლიდან საექსპორტო ღვინოების ინსპექტირებაში საერთაშორისო ორგანიზაციები ჩაერთვებიან“-ამის შესახებ რადიო „კომერსანტის“ საახალწლო ეთერში ღვინის ეროვნული სააგენტოს თავმჯდომარემ, ლევან მეხუზლამ განაცხადა.
მიუხედავად გარკვეული გამოწვევებისა, რაც 2019 წლის ზაფხულში გვქონდა, საბოლოო ჯამში, გასული წელი წარმატებულად შეიძლება ჩაითვალოს. ექსპორტის 10%-იანი ზრდა და მიღებული შემოსავლების 19%-იანი ზრდა გვქონდა. ის მთავარი დაპირება,რომ ყურძენი არ დარჩენილიყო ჩაუბარებელი, შესრულდა, თუმცა თავისუფალი ბაზრის პირობებში ყოველთვის მოსალოდნელია ფასის თამაში და ცვლილებები“- აღნიშნა ლევან მეხუზლამ. მისი თქმით, დარგი ბოლო რამდენიმე წლის განმავლობაში საგრძნობლად გაიზარდა, თუმცა, ზრდის პარალელურად ხარისხის მიმართულებით გარკვეული კომპრომისებიც იყო.
ხარისხი ის კომპონენტია,რომელთან დაკავშირებითაც კომპრომისი არ უნდა დაუშვან. საქართველო მასიური წარმოების ღვინოს ვერ შესთავაზებს გლობალურ ბაზარს და ვერ გაუწევს კონკურენციას ამ მიმართულებით, ჩილეს,ავსტრალიას. რაც შეეხება ხარისხს, ეს ის კომპონენტია,რომელზეც უნდა ვიზრუნოთ. შარშან გვქონდა ინსპექტირება, ავიღეთ ნიმუშები, 2020 წელს ეს პროცესი კიდევ გაგრძელდება და გაიზრდება. მეტი გამჭირვალობისთვის საერთაშორისო ორგანიზაციებიც ჩაერთვებიან,- აღნიშნავს მეხუზლა. მისი ვარაუდით, 2020 წელს ექსპორტზე გატანილი ღვინის რაოდენობა შესაძლოა საგრძნობლად აღარ გაიზარდოს, თუმცა, ქვეყნის მთავარი ორიენტირი სტაბილურობის შენარჩუნება იქნება.
2019 წელს 90 მილიონზე მეტი ბოთლი გადაიზიდა საქართველოდან, ვვარაუდობ რომ 2020 წელს რაოდენობის მხრივ პროცენტული ზრდა მოსალოდნელი აღარ არის, თუმცა 10%-ის ფარგლებში უნდა შენარჩუნდეს. ჩვენ გვგონია,რომ მივაღწიეთ იმ ეტაპს,როცა უნდა ვიზრუნოთ სტაბილურობაზე და რა თქმა უნდა, ხარისხზე და უნიკალურობაზე. ნაკლებად უნდა გამოვეკიდოთ რაოდენობას,- ამბობს ლევან მეხუზლა.