საქართველოში მოქმედი სასტუმროებისა და სასტუმროს ტიპის სახლების რაოდენობა 2020 წელს 2019 წელთან შედარებით 37%-ით 1054-მდე, სტუმრების რაოდენობა კი ბევრად უფრო მკვეთრად – 66.5%-ით 1.345 მლნ-მდე შემცირდა. ამის შესახებ ინფორმაციას საქსტატი ავრცელებს.

2020 წელს მოქმედი სასტუმროების საერთო ფართი 19.6%-ით 1.826 მლნ კვადრატულ მეტრამდე, ხოლო ნომრების საცხოვრებელი ფართი 19.5%-ით 834 ათას კვადრატულ მეტრამდე შემცირდა.

გასულ წელს სასტუმროებში ნომრების რაოდენობა 23.4 პროცენტით 26.9 ათასამდე, ხოლო ნომრებში ადგილების რაოდენობა 24.1 პროცენტით 57.9 ათასამდე შემცირდა. ყველაზე მეტად 66.5%-ით 1.345 მლნ-მდე სტუმრების რაოდენობა შემცირდა.

სასტუმროების 57%-ზე მეტის ორგანიზაციულ-სამართლებრივი ფორმა შეზღუდული პასუხისმგებლობის საზოგადოებაა, 40% ინდმეწარმეების საკუთრებაა, 1.3% კი სააქციო საზოგადოების სახით ფუნქციონირებს.

2020 წელს პანდემიისა და კოვიდრეგულაციების გამო, საერთაშორისო მოგზაურთა რაოდენობა 81%-ით 1.747 მლნ-მდე, მათგან ვიზიტორების რიცხვი 86%-ით 1.398 მლნ-მდე, ხოლო ტურისტების რაოდენობა 78.6%-ით 1.087 მლნ-მდე შემცირდა. ვიზიტების 60%-ზე მეტი იანვარ-თებერვალში განხორციელდა, დანარჩენ 10 თვეში კი საზღვრის მკვეთთა უმრავლესობა სატვირთო გადაზიდვებთან იყო დაკავშირებული.

მიუხედავად იმისა, რომ ბოლო თვეებში ტურისტების რაოდენობა გასული წლის ანალოგიურ პერიოდთან შედარებით სამნიშნა პროცენტული მაჩვენებლით იზრდება, 7 თვეში მათი რიცხვი 2019 წლის ანალოგიურ პერიოდს მაინც 76%-ით ჩამორჩება.

მთავრობის სურვილი, რომ ტურიზმი პანდემიამდელ პერიოდის 50%-მდე აღდგეს, ჯერჯერობით მხოლოდ სურვილად რჩება. მას ხელს გართულებული ეპიდვითარება და ვაქცინაციის დაბალი ტემპი უშლის.

მთავრობის მსგავსად ასევე ოპტიმისტურადაა განწყობილი თიბისი კაპიტალიც, რომელიც ფიქრობს, რომ წელს ტურიზმიდან მიღებული შემოსავალი პანდემიამდელი პერიოდის 40%-ს მიაღწევს, 2022 წელს კი 10%-ით გადააჭარბებს. 2019 წელს ტურიზმიდან მიღებულმა შემოსავალმა $3.3 მლრდ-ს მიაღწია, ყველა გათვლით 2020 წელს მას $3.5 მილიარდისთვის უნდა მიეღწია, მაგრამ პანდემიისა და კოვიდრეგულაციების გამო $3 მლრდ დაიკარგა.