2020 წლის მდგომარეობით საქართველოში 110 ცხოველთა სასაკლაო ფუნქციონირებდა, წლის განმავლობაში სასაკლაოებში 288 ათასი სული პირუტყვი დაიკლა, 1 წლის განმავლობაში დაკლულ პირუტყვთა რაოდენობა, 2019 წელთან შედარებით, 34%-ით შემცირდა. დაკლული ფრინველის რაოდენობა, წინა წელთან შედარებით, 9%-ით 12 მლნ ფრთამდე გაიზარდა, წარმოებული ხორცის საერთო რაოდენობა კი 8%-ით – 37 ათას ტონამდე შემცირდა. ამის შესახებ ინფორმაციას საქსტატი ავრცელებს.
მსხვილფეხა პირუტყვის დაკვლის საშუალო ღირებულება 26.8 ლარს შეადგენდა, ღორის - 24.3 ლარს, ცხვრისა და თხის კი - 12.8 ლარს.
სასაკლაოების 50% თანამედროვე ტექნოლოგიებით იყო აღჭურვილი, 45.5% ნაწილობრივ თანამედროვე ტექნოლოგიებით, ხოლო 4.5%-ს თანამედროვე ტექნოლოგიები არ გააჩნდა.
2020 წლის მდგომარეობით სესხით სასაკლაოების მხოლოდ 30% სარგებლობდა, მათგან 48.5%-ს სესხი ძირითადი კაპიტალის შესაძენად ჰქონდა აღებული, 33.3%-ს საბრუნავი კაპიტალისთვის და 18.2%-ს როგორც ძირითადი ასევე საბრუნავი კაპიტალისთვის.
სასაკლაოებთან ერთად 2020 წელს ქვეყანაში 194 სამაცივრე მეურნეობაც ფუნქციონირებდა. მაცივრებში წლის განმავლობაში ჯამში 308 ათასი ტონა პროდუქცია იყო განთავსებული, მათ შორის: 56.2% ქათმის ხორცი, 14.3% პირუტყვის ხორცი, 12.6% ხილ-ბოსტნეული, 12.4% თევზეული 2.1% რძის პროდუქტები და 2.4% დანარჩენი საქონელი. სამაცივრე მეურნეობებიდან რეალიზებული პროდუქციის ღირებულებამ 218 მლნ ლარს მიაღწია.
რაც შეეხება ელევატორებს, მათი რაოდენობა 2020 წლის მდგომარეობით 51-ს შეადგენდა. ელევატორებში სულ 487 ათასი ტონა პროდუქცია იყო შენახული, მათ შორის: 77.3% ხორბალი, 8.6% სიმინდი, 8.3% სოიოს შროტი და 3.3% ხორბლის ფქვილი. წლის განმავლობაში ელევატორების მიერ გაყიდულმა პროდუქციის ჯამურმა ღირებულებამ 358 მლნ ლარს გადააჭარბა.