2020 წელი საქართველოსთვის ერთ-ერთი რთული წელი იყო თავისი გამოწვევებით და კრიზისებით. მიმდინარე წელს საქართველოს მთავრობამ კარანტინი უკვე მორედ გამოცხადა, ოფიციალურად ხელისუფლებამ წერტილოვანი შეზღუდვები აამოქმედა თუმცა, მათი გადაწყვეტილებით ქვეყანა რეალურად ისევ დაიკეტა. ათი ათასობით ადამიანი, ჩაკეტილ ქალაქებში უმუშევრები, შემოსავლის გარეშე არიან დარჩენილები ქვეყანა მძიმე სოციალურ- ეკონომიკურ და ეპიდემიოლოგიურ მდგომარეობაშია თუმცა, ამჯერად „კომერსანტი“ 2020 წლის პოზიტიური მოვლენებს გაგაცნობთ:
საქართველოში ამერიკის ელჩად კელი დეგნანი დაინიშნა
საქართველოში ამერიკის ელჩად კელი დეგნანი 2019 წელის მიწურულს დაინიშნა, თუმცა საქმიანობას ელჩი 2020 წელს შეუდგა. საქართველოში ამერიკის ელჩის თანამდებობა მას შემდეგ გახდა ვაკანტური, რაც ამერიკელ დიპლომატს, იან კელის უფლებამოსილების 3-წლიანი ვადა ამოეწურა. ეს თანამდებობა წელიწადზე მეტხანს იყო თავისუფალი და ელჩის მოვალეობას, მისი მოადგილე ელიზაბეთ რუდი ასრულებდა.
ქუთაისის საერთაშორისო უნივერსიტეტი გაიხსნა
ქუთაისში საერთაშორისო უნივერსიტეტი გაიხსნა. უნივერსიტეტში პირველ სასწავლო წელს სწავლა 246 სტუდენტმა მენეჯმენტს, მათემატიკას და კომპიუტერულ მეცნიერებებს მიმართულებით დაიწყო . უნივერსიტეტის მშენებლობისთვის „ქართუ ფონდის“ მიერ მილიარდი ევრო გამოიყო. აკადემიური კორპუსი, სტუდენტური საცხოვრებელი და სხვა დამხმარე კორპუსების ნაწილი დასრულებულია, ნაწილის მშენებლობა კი 4-5 წელიწადში დასრულდება.
ბათუმის სტადიონი გაიხსნა
14 წლიანი მოლოდინის შემდეგ ბათუმის სტადიონი გაიხსნა. ბათუმში სტადიონი 2006 წელს დაანგრიეს და მას შემდეგ ქვეყნის ერთ-ერთი ყველაზე ტრადიციული და ისტორიული გუნდი, ბათუმის „დინამო“ საკუთარი სტადიონის გარეშე დარჩა. ბევრი დაპირების და გამართული ტენდერის მიუხედავად, მშენებლობა მხოლოდ 2017 წელს დაიყო და 2020 წლის აგვისტოში დასრულდა. სტადიონი 20 000 მაყურებელზეა გათვლილი და უეფას IV კატეგორიის მოთხოვნებს აკმაყოფილებს. სტადიონის მშენებლობა აჭარის ბიუჯეტიდან, დაახლოებით 141 მლნ ლარით დაფინანსდა.
ხაშურის შემოვლითი, 13 კმ-იანი გზა გაიხსნა.
აღმოსავლეთ-დასავლეთის ჩქაროსნული ავტომაგისტრალის შემადგენელი, ზემო ოსიაური-ჩუმათელეთის პროექტის ნაწილი – ხაშურის შემოვლითი გზა გაიხსნა. ახალი გზის საშუალებით გადაადგილების დრო 40-50%-ით შემცირდა და მგზავრობა არსებულ გზაზე 20 წუთის ნაცვლად, 10 წუთშია შესაძლებელი.
პროექტი ევროპის საინვესტიციო ბანკის (EIB) ფინანსური მხარდაჭერით და ევროკავშირის ფინანსური გარანტიით განხორციელდა და 133 მლნ ლარი შეადგინა, ხოლო მსოფლიო ბანკის (WB) ფინანსური მხარდაჭერის წილი პროექტში 50 მლნ ლარია.
ჭავჭავაძის გამზირის რეაბილიტაცია დასრულდა
ჭავჭავაძის გამზირი მრავალთვიანი რეაბილიტაციის შემდეგ, 2020 წლის პირველ აგვისტოს, საბოლოოდ გაიხსნა. ქუჩაში გასულ მოქალაქეებს მნიშვნელოვანი ცვლილებები დახვდათ. რეაბილიტაციის დასრულების პარალელურად შეიცვალა სატრანსპორტო გადაადგილების სქემამაც.
შეკვეთილის დენდროლოგიური პარკი გაიხსნა
შეკვეთილის დენდროლოგიური პარკი გაიხსნა. 60 ჰექტარზე გაშენებული ბაღი, ადგილობრივი და მსოფლიო ეგზოტიკური ფლორის ათასობით სახეობას აერთიანებს. შეკვეთილის დენდროლოგიურ პარკში, 18 ჰექტარზე გაშენდა ჩვენი ქვეყნის სხვადასხვა კუთხიდან გადმორგული 29 უნიკალური სახეობის 200-ზე მეტი გიგანტური ხე. 42 ჰექტარზე კი, მსოფლიოს ხუთივე კონტინენტიდან, წლების განმავლობაში შემოტანილი სხვადასხვა ეგზოტიკური სახეობის ათასობით ხე-მცენარეა წარმოდგენილი. მცენარეთა უნიკალურ კოლექციასთან ერთად, პარკის ტერიტორიაზე მსოფლიოს ყველა კონტინენტის 58 სახეობის ფრინველი ბინადრობს, რომელთა უმეტესობა წითელ ნუსხაშია შეტანილი. პროექტის ღირებულება 10 მლნ ლარზე მეტია.
კურორტ წყალტუბოს გენერალური გეგმა ექნება
კურორტ წყალტუბოს გენერალური გეგმის კონცეფცია რამდენიმე თვეში ექნება, შესაბამის ხელშეკრულებას ხელი უკვე მოეწერა. მას შემდეგ რაც „ქართული ოცნების“ ლიდერმა ბიძინა ივანიშვილმა „წყალტუბოს აღორძინების“ გეგმას ჩაუყარა საფუძველი, ეს კურორტის ახალ სიცოცხლისთვის გადადგმული ერთადერთი ქმედითი ნაბიჯია. საქართველოს რეგიონული განვითარების და ინფრასტრუქტურის სამინისტროს მიერ გამოცხადებულ კონკურსში, რომელიც ითვალისწინებდა წყალტუბოს გენერალური გეგმის კონცეფციის შემუშავაბას, კომპანია „ბაუ დიზაინმა“ გაიმარჯვა. კომპანიის მიერ წარმოდგენილი გუნდი დაკომპლექტებულია როგორც ადგილობრივი, ისე უცხოელი ექსპერტებითა და დარგის სპეციალისტებით. მათ შორისაა Cushman & Wakefield-ის ადგილობრივი გუნდი და კომპანიის საერთაშორისო პარტნიორი ფრედერიკ ლე ფიშუ.
იპოდრომის ტერიტორიაზე თბილისის ცენტრალური პარკი მოეწყობა
კომერსანტის ექსკლუზივი დადასტურდა, ძველი იპოდრომის ტერიტორიაზე თბილისის ცენტრალური პარკი მოეწყობა.ბიძინა ივანიშვილის გადაწყვეტილებით, ყოფილი იპოდრომის ტერიტორია საჩუქრად, უსასყიდლოდ თბილისის მუნიციპალიტეტს გადაეცა. ფონდი „ქართუმ“ ვალდებულება აიღო, უახლოეს პერიოდში ამ ტერიტორიაზე ახალი მულტიფუნქციური სარეკრეაციო ზონა მოაწყოს. პროექტზე ჰოლანდიური კოპანია მუშაობს და მშენებლობა რამდენიმე ათეული მილიონი დაჯდება. დედაქალაქის მერის განცხადებით პროექტის განხორციელებას დაახლოებით 3 წელი დასჭირდება.
ლანჩხუთი ევროპაში
ქალთა საფეხბურთო კლუბ „ლანჩხუთის“ შესახებ საქართველოს მოსახლეობის დიდმა ნაწილმა ახლახანს შეიტყო. მაშინ, როცა რუმინული კლუჟი დაამარცხეს და ჩემპიონთა ლიგაზე გავიდნენ. ქართული ფეხბურთის ისტორიაში „ლანჩხუთი“ გახდა პირველი გუნდი, რომელმაც უეფას საკლუბო ტურნირის მეორე საკვალიფიკაციო ეტაპი მოიგო. თუმცა „ლანჩხუთი“ უეფას ჩემპიონთა ლიგის 1/16 ფინალის შვედურ „როსენგარდთან“ დამარცხების შემდეგ გამოეთიშა.