ჰორეკა სექტორის წარმომადგენლები სასმელი, არაგაზირებული წყლის ღირებულების ზრდაზე ალაპარაკდნენ. მათი თქმით, ქართული წყლის შეძენა მომხმარებელს და სექტორს დაახლოებით 10-15 პროცენტით უფრო ძვირად უწევს. წყლის კომპანიები „კომერსანტთან“ განმარტავენ, რომ მათი მხრიდან არაგაზირებულ წყალზე ფასის ზრდა გამოწვეულია დოლარის ფასის ცვლილებით, რამაც შემდგომში წყლის ჩამოსასხმელად აუცილებელი ნედლეულის, (ეტიკეტის, თავსახურის) გაძვირება გამოიწვია. ეს პროდუქცია საქართველოში ძირითადად თურქეთიდან შემოდის.
„ჩვენ ვაწარმოებთ ბახმაროს და ასევე ჯეო ნატურალსს. არაგაზირებული წყალი ზოგადად გაძვირებულია მიუხედავად იმისა, რომ ჩვენი კომპანია 20 წელია უკვე ბაზარზეა და მთელი ამ პერიოდის განმავლობაში მაქსიმალუად ვცდილობდით რომ ფასი არ გაგვეძვირებინა, ბევრი ძალისხმევის მიუხედავად სამწუხაროდ მოგვიწია წყლის ღირებულების გაზრდა. მნიშვნელოვანია მიზეზები, რითაც ამ პროდუქტზე ფასის ზრდა არის გამოწვეული - პირველ რიგში ეს არის დოლარის კურს, რასაც მთელ ეკონომიკაზე ჰქონდა გავლენა. გარდა ამისა კოვიდ სიტუაციიდან გამომდინარე რთული მდგომარეობა ჰქონდა ბევრ კომპანიას. გაზრდილია ბენიზინის ფასიდან დაწყებული , ტარას (ნედლეული) შესყიდვის ფასით დასრულებული , თითქმის ყველაფერი, რაც უცხოურ ვალუტაშია. ეს ყველაფერი ახდენს პროდუქტის ფასზე გავლენას. დღევანდელი ეკონომიკური მდგომარეობიდან გამომდინარე ფასის პირვანდელ მდგომარეობაში დაბრუნება საეჭვოა,“- განმარტავენ კომპანია ნაბეღლავის საზოგადოებასთან ურთიერთობის სამსახურში.
წყალი „სნო“-ს ფასიც გაზრდილია როგორც რესტორნებში ასევე მარკეტებში. კომპანიაში მიიჩნევენ, რომ წელს წყალზე ფასის უფრო მეტად მატება ნაკლებ სავარაუდოა. კომპანიაში ასევე განმარტავენ, რომ პროდუქციის ღირებულების პირვანდელ მდგომარეობაში დაბრუნება კითხვის ნიშნის ქვეშ დგას.
„მცირე გაძვირება აისახა ჩვენ პროდუქციაზე, თუნდაც იმ ნედლეულის გამო, რაც თურქეიდან შემოგვაქვს. დოლარის კურსის გამო გაძვირდა თავსახური, ეტიკეტი. რა თქმა უნდა წყალი არ გაძვირებულა. როგორც იცით, ჩვენი წყალი მარკეტების და ჰორეკას სექტორის დიდ ნაწილს მოიცავს. წელს არ მგონია „სნო“ კიდევ გაძვირდეს. პანდემიის პერიოდში გაყიდვები საკმაოდ მძიმე სიტუაციაში იყო,ჰორეკას სეგმენტის მთლიანად დახურვის გამო“ - განმარტავენ კომპანია „სნოს“ მარკეტინგის სამსახურში.
მარიამ მორგოშია