დღეს სასტუმრო „რადისონში“ სადაზღვევო კომპანია არდიმ მულტინაციონალურ საინვესტიციო ფონდ „Gazelle Finance”-თან საინვესტიციო ხელშეკრულება გააფორმა, რომლის შედეგად “Gazelle Finance” არდის სტრატეგიული აქციონერი გახდა. საინვესტიციო პაკეტის მოცულობა 2 მილიონ აშშ დოლარამდეა, რაც თავის მხრივ, კომპანიის კიდევ უფრო მეტ განვითარებას, გაუმჯობესებულ მომსახურებას და მოწინავე ციფრული ტექნოლოგიების დანერგვას გულისხმობს. „Gazelle Finance”-ის ინვესტორები თავის მხრივ მოიცავს ისეთ საერთაშორისო ფინანსურ ინსტიტუტებს, როგორიცაა - DFC (ყოფილი OPIC) და FMO.

ხელმოწერის ცერემონიალის პარალელურად, არდიმ პრესას და საზოგადოებას სამეთვალყურეო საბჭოს ახალი, დამოუკიდებელი წევრი - ვოლფგანგ ვანდი წარუდგინა. მას აქვს 40-წლიანი გამოცდილება სადაზღვევო, საგადამზღვევო, ჯანდაცვისა და პორტფელის საინვესტიციო მართვის სფეროში. ვოლფგანგ ვანდი 2008-2012 წლებში მსოფლიოს უდიდეს სადაზღვევო კომპანია Allianz SE-ს აღმასრულებელი ბორდის თავმჯდომარის პოზიციაზე ხელმძღვანელობდა და ახორციელებდა კომპანიის რეგიონულ მართვას ევრაზიის ქვეყნებში. მანამდე, 6 წლის მანძილზე აღმასრულებელი დირექტორის რანგში ხელმძღვანელობდა ESG - European Specialty Reinsurance Group - Standard & Poors-ის მიხედვით A- რეიტინგის მქონე ყველაზე მსხვილ სადაზღვევო პულს ჯანდაცვის, უბედური შემთხვევისა და სიცოცხლის დაზღვევის მიმართულებით, მსოფლიოს უდიდესი გადამზღვევი კომპანიის SwissRe-ს მხარდაჭერით მსოფლიოს მასშტაბით სხვადასხვა ქვეყნის ოფისებში: ბერმუდა, დუბლინი, ლონდონი ჰამბურგი, მოსკოვი, ტორონტო, მაიამი, ჰონგკონგი და კუალა ლუმპური.

„როგორც აღნიშნული ამერიკული საინვესტიციო კაპიტალის შემოდინება კომპანიაში, ასევე ახალი, უდიდესი გამოცდილების მქონე დამოუკიდებელი სამეთვალყურეო საბჭოს წევრის შემომატება ჩვენს გუნდში, ეს არის მნიშვნელოვანი ეტაპი არდისთვის, რის შედეგადაც კომპანია განვითარების სრულიად ახალ საფეხურზე გადადის, რაც მალე აისახება ჩვენი დაზღვეულებისთვის კიდევ უფრო მეტად დახვეწილი მომსახურების შექმნაში. მნიშვნელოვნად შეიცვლება ის ციფრული ეკოსიტემა, რომელსაც დღეს არდი იყენებს, როგორც შიდა პროცესების მართვისთვის, ისე ჩვენი დაზღვეულების სამომხმარებლო პლატფორმებისთვის. ძალიან ვაფასებთ Gazelle Finance-ის უწყვეტ და მზარდ მხარდაჭერას არდის მიმართ, როგორც მრავალი ქვეყნის მასშტაბით აღიარებულ საერთაშორისო ფინანსურ პარტნიორს, რომელიც საუკეთესოდ იცნობს საქართველოს ფინანსური ბაზრის კონიუნქტურებს,“ ¬- განაცხადა არდის გენერალურმა დირექტორმა მიხეილ ჯაფარიძემ.

„Gazelle Finance მოხარულია გააგრძელოს პარტნიორობა არდისთან, ამჯერად უკვე როგორც სტრატეგიულმა ინვესტორმა“ - აღნიშნა ჯეფრი ლიბერტმა, Gazelle Finance-ის აღმასრულებელმა დირექტორმა. „ჩვენი საინვესტიციო მხარდაჭერით, არდი გადადგამს მნიშვნელოვან ნაბიჯს კორპორაციული მართვის სტრუქტურის კიდევ უფრო ასამაღლებლად, საერთაშორისო სტანდარტებისა და გლობალური სადაზღვევო ინდუსტრიის შესაბამისად. ამ პროცესის თანმდევია, სამეთვალყურეო საბჭოს შემადგენლობაში უმაღლესი სადაზღვევო გამოცდილების მქონე აღმასრულებელი წევრის დამატება ბატონი ვოლფგანგ ვანდის სახით“.

„ჩემთვის დიდი პატივია, გავუწიო მეგზურობა არდის, როგორც საუკეთესო მზღვეველ კომპანიას ქართულ სადაზღვევო ბაზარზე, მის მოტივირებულ მმართველ გუნდთან ერთად. კომპანია უკვე წინ უსწრებს კონკურენტებს ტექნოლოგიებზე ორიენტირებული აპლიკაციებისა და მომსახურების სტანდარტების მიხედვით. ჩემს კოლეგა დირექტორებთან ერთად ჩვენ უზრუნველვყოფთ ბიზნესის წარმართვას დასავლური კორპორაციული მართვის სტანდარტების შესაბამისად და მოხარული ვარ, რომ მექნება შესაძლებლობა, ჩემი მრავალწლიანი ექსპერტიზა და გამოცდილება გამოვიყენო არდის განვითარების ამ ახალ გზაზე“ - განაცხადა არდის სამეთვალყურეო საბჭოს აღმასრულებელმა მოადგილემ ვოლფგანგ ვანდიმ.

(R)