თბილისის ცენტრალური ინფექციური საავადმყოფოს სამედიცინო დირექტორის მარინა ეზუგბაიას განცხადებით, კორონას 158 ახალი დადასტურებული შემთხვევიდან 87-აჭარას, 18 კი თბილისს უკავშირდება. მისივე განმარტებით, ვირუსის გავრცელების მაჩვენებელი პანიკის საფუძველს არ იძლევა, რადგან მთავრობის, ჯანდაცვის სამინისტროსა და დაავადებათა კონტროლის ცენტრის მიერ სწრაფი და თანაზომიერი ქმედებები განხორციელდა.

„დღეისთვის დაგვემატა 158 ახალი დადასტურებული შემთხვევა და გვაქვს 2075. ეს 158 დადასტურებული შემთხვევა ასეთი განაწილებითაა - 87 არის აჭარა, 28 არის სამეგრელო, 19 არის იმერეთი, 6-გურია და 18-თბილისი. ასეთი მაჩვენებელი ქვეყანაში არ ყოფილა, მაგრამ ეს ჩვენ პანიკის საფუძველს არ გვაძლევს და ამიტომ მინდა გითხრათ, რომ შედარებით წყნარად ვიყოთ და ავხსნი, რატომ არ არის ეს პანიკის საფუძველი. გამომდინარე იქიდან, რომ ძალიან მყისიერი, სწრაფი, თანაზომადი ქმედებები განხორციელდა მთავრობის, ჯანდაცვის საინისტროსა და დაავადებათა კონტროლის მიერ, ძალიან სწრაფად მოხდა ინფიცირებულების კონტაქტების მოძიება და მათი გამოკვლევა,“- განაცხადა მარინა ეზუგბაიამ.

მისისვე განმარტებით, ბათუმსა და ცაგერში ვირუსი თითქმის ლოკალიზებულია. „შემიძლია გითრათ, რომ ამ 158-დან ყველაზე დიდი რაოდენობა არის ბათუმში და ბათუმში თითქმის უკვე ლოკალიზაციისკენ მივდივართ ანუ ასეთი სწრაფი კვლევები იმის საშუალებას იძლევა, რომ მათი კონტაქტების იზოლაცია მოვახდინოთ, რითიც ჩვენ მყარად შეგვიძლია ვთქვათ, რომ დაავადების გავრცელების შეწყვეტას განვახორციელებთ. ბათუმი თითქმის ლოკალიზებულია. ლოკალიზებულია ასევე ცაგერი“,- განაცხადა მარინა ეზუგბაიამ.

როგორც ეზუგბაიამ ჟურნალისტებს განუცხადა, რაც მეტი გამოვლენილი და დადასტურებული კონტაქტი იქნება, კორონავირუსის გავრცელების ნაკლები საშიშროება იქნება.

„ძალიან აქტიურად ხდება კონტაქტების გამოვლენა, შესაბამისად იზრდება კონტატებიც და ახალი შემთხვევების ციფრი. ეს ზუსტად იმის საფუძველია, რომ ჩვენ დაავადების ლოკალიზაციისკენ და შესუსტებისკენ მივდივართ. რაც კარგი გამოსავალია დროული ლიკვიდაციის ამ ახალწარმოქმნილი წერტილების, კერების, წყაროების და კლასტერების.

მთავარია, რომ ძალიან აქტიური მუშაობა მიმდინარეობს მთავრობასთან, საათობრივი ურთიერთობა გვაქვს სამედიცინო სექტორს ჯანდაცვის სამინისტროსთან, შესაბამისად, დროული გადაწყვეტილების შედეგად დარწმუნებულები ვართ, რომ ეს სიტუაცია ისეთივე მართვადი და კონტროლირებადი გახდება, როგორც აქამდე გვქონდა.

თუ არ ვცდები დღეში 9000-მდე ტესტი კეთდება. ტესტების რაოდენობა, რაც კეთდება ზუსტად აჩვენებს, რომ ინფექციის გამოვლენის მაჩვენებელი მაღალია, რაც კარგია იმ თვალსაზრისით, რომ თვითიზოლაცია ხდება, იზოლაციის შედეგად კი გავრცელების მაქსიმალური პრევენციაა. რაც მეტი გამოვლენილი და დადასტურებული კონტაქტი იქნება, მით ნაკლები საშიშროებაა დაავადების გავრცელების.