2020 წლის იანვარ-ნოემბერში ქართულმა კომერციულმა ბანკებმა ჯამში 1.5 მილიონიანი ზარალი განიცადეს. მხოლოდ ნოემბრის განმავლობაში კი, წმინდა მოგებამ 84.5 მილიონი ლარი შეადგინა. ამის შესახებ ინფორმაცია ეროვნულ ბანკის მიერ გამოქვეყნებული ანგარიშშია მოცემული.

ნოემბერში ფინანსური ინსტიტუტების საოპერაციო მაჩვენებლები გაუმჯობესდა და შემოსავლებმა 433.7 მილიონ ლარს მიაღწია, რაც წლიურად 10%-ით არის გაზრდილი. ფინანსური ანგარიშის მიხედვით, არსებული ზარალის მთავარი განმაპირობებელი ფაქტორი ბანკების მხრიდან მოსალოდნელი საკრედიტო დანაკარგების რეზერვში 1.2 მილიარდი ლარის აკუმულირებაა. ჯამურად, ქართულმა კომერციულმა ბანკებმა აქტივების შესაძლო დანაკარგების ბუფერში 1.22 მილიარდი ლარი დაარეზერვეს, რაც მოსალოდნელი კრიზისიდან გამომდინარე, სესხებზე შესაძლო დანაკარგების თანხას ასახავს.

2020 წლის 11 თვეში ქართული ბანკების შემოსავალი ფიზიკური პირების სესხებიდან 107 მილიონი ლარით შემცირდა და მან 1.85 მილიარდი ლარი შეადგინა. ფიზიკური პირების სესხების პორტფელი 18.6 მილიარდი ლარია, რაც მთლიანად საბანკო სესხების 51%-ია. კომერციულ ბანკებსა და ფიზიკურ პირებს შორის 3 მილიონი სასესხო ხელშეკრულებაა მოქმედი, რომლიდააც 1.3 მილიონი სესხი სამომხმარებლოა, 112 ათასი კი იპოთეკური, 251 ათასი ბიზნესის განვითარებისთვის აღებული სესხი, 202 ათასი სალომბარდე სესხი, 1.2 მილიონი კი სხვა დანიშნულებებისთვის აღებული სესხებია.

ეროვნული ბანკის მონაცემებით, საშუალო განაკვეთი ფიზიკურ პირებზე გაცემული სესხებისთვის 12.34%-ს შეადგენს, იურიდიული პირების სესხების საშუალო განაკვეთი კი 6.62%-ია. განაკვეთებს შორის სხვაობას, პირველ რიგში, ამ სესხების განსხვავებული რისკიანობა და სავალუტო შემადგენლობა განაპირობებს.

პირველი ნოემბრისთვის ვადაგადაცილებული სესხების პორტფელმა 570 მილიონ ლარს მიაღწია, რაც წინა თვესთან შედარებით 48 მილიონი ლარით მეტია. ამ ზრდის მიუხედავად, საბანკო სექტორში ვადაგადაცილებების მაჩვენებელი მაინც დაბალ ნიშნულზე, 1.54%-ზე ნარჩუნდება, თუმცა ეროვნული ბანკის პროგნოზით, ვადაგადაცილებების მოცულობა მომდევნო თვეების განმავლობაში საგრძნობლად გაიზრდება.