Covid-19-თ გამოწვეული კრიზისის შემდეგ, სოციალური აქტივობების შეზღუდვის მიზნით, მთავრობამ  მკაცრი ზომები  მიიღო. საქართველოში გამოცხადებულია „კომენდანტის საათი“ და თითქმის ყველა სექტორში შეზღუდულია ეკონომიკური საქმიანობა. შეზღუდვების პარალელურად, დაიწყო აქტიური კამპანია, რომ დავრჩეთ სახლში და დისტანციურად ვიმუშაოთ. საქართველოში დასაქმებულთა რა ნაწილს შეუძლია იმუშაოს სახლიდან - ამ თემაზე კვლევა ვენეციის, ვერონას და პადოვას უნივერსიტეტების ეკონომიკის მეცნიერებათა დოქტორმა ირაკლი ყიფიანმა და  ეკონომიკის მაგისტრმა ( ISET) დურუ მახარაძემ მოამზადეს.

კვლევის მიხედვით, ქვეყანაში დასაქმებულთა 52% მუშაობს ისეთ სექტორებში, სადაც მხოლოდ 20%-ზე ნაკლებს შეუძლია დისტანცირებული მუშაობა. ყველაზე მეტად ზარალდება შემდეგი სექტორები:

» სოფლის, სატყეო და თევზის მეურნეობა - 5%

» სასტუმროები და რესტორნები - 3%

» მშენებლობა - 14%

» ტრანსპორტირება და დასაწყობება - 14%.

დასაქმებულთა ნახევარზე მეტს დისტანციურად მუშაობა შეუძლია მხოლოდ 5 სექტორში, თუმცა ამ სექტორებში დასაქმებულთა მხოლოდ 15% არის დასაქმებული:

» ინფორმაცია და კომუნიკაცია - 62%

» საფინანსო და სადაზღვევო საქმიანობები - 73%

» პროფესიული, სამეცნიერო და ტექნიკური საქმიანობები - 76%

» ადმინისტრაციული და დამხმარე მომსახურების საქმიანობები - 75%

» განათლება - 71%.

სექტორების მიხედვით კვლევამ აჩვენა, რომ დასაქმებულთა მხოლოდ 24%-ს შეუძლია დისტანციურად მუშაობა. ეს ნიშნავს, რომ 1.3 მილიონ დასაქმებულ ადამიანს, დღეს, მნიშნელოვნად აქვს შეზღუდული მუშაობის შესაძლებლობა, რაც პირდაპირ აისახება მათ შემოსავალზე.

დასაქმებულთა 58% მუშაობს ისეთ პოზიციებზე, სადაც საქმიანობის გაგრძელება დისტანციურად შეუძლებელია:

» სოფლის მეურნეობისა და მეთევზეობის დარგის კვალიფიციური მუშაკები - უდიდესი ნაწილი თვითდასაქმებულია;

» ხელოსნები და მონათესავე პროფესიების მუშაკები;

» არაკვალიფიციური მუშები.

ასევე აღსანიშნავია, რომ კვლევის მიხედვით, საქართველოს სტატისტიკის ეროვნული სამსახურის შინამეურნეობის გამოკითხვების მიხედვით (2018 წელი), საქართველოს მოსახლეობის მხოლოდ 52%-ს აქვს სახლში ინტერნეტი. ქალაქში მცხოვრები მოსახლეობის - 28%-ს არ აქვს სახლში ინტერნეტი, ხოლო სოფლად - 74%-ს.