რამდენიმე წუთის წინ ისრაელის პარლამენტმა, ახალი მთავრობის ფორმირებას კენჭისყრის შედეგად მხარი დაუჭირა. კოალიციას სათავეში იამინის ლიდერი, ნაფტალი ბენეტი უდგას. პარლამენტის მიერ ახალი მთავრობის დამტკიცებით ყოფილი პრემიერმინისტრის, ბენიამინ ნეთანიაჰუს 12 წლიანი მმართველობა ოფიციალურად დასრულდა.
ე.წ. "ცვლილებების მთავრობა" პარლამენტმა 120 ხმიდან 60-ით დაამტკიცა. 59 კი წინააღმდეგი იყო.
კოალიციური შეთანხმების შედეგად, იამინის ლიდერი ნაფტალი ბენეტი პრემიერმინისტრის თანამდებობას 2023 წლის სექტემბრამდე დაიკავებს, რის შემდეგაც ის თანამდებობას მომდევნო ორი წლით იეშ ატიდის ლიდერს, იარ ლაპიდს გადააბარებს.
ისრაელის ოპოზიციური პარტიები ერთიანობის მთავრობის ფორმირებაზე 3 ივნისს შეთანხმდნენ. მოცემული შეთანხმება გახდა ბენიამინ ნეთანიაჰუს 12-წლიანი პრემიერმინისტრობის დასასრული.
ცენტრისტული იეშ ატიდის (მომავლის პარტია) ლიდერის, იაირ ლაპიდის თქმით, ერთიანობის კოალიციის შეთანხმება წარმატებით დასრულდა.
მარტში ჩატარებული ისრაელის საპარლამენტო არჩევნების შედეგების მიხედვით პრემიერმინისტრი ნეთანიაჰუს კოალიციამ 52 ადგილი მოიპოვა, ანტინეთანიაჰუს ბლოკმა 57, პარტია იამინამ 7, არაბთა პარტია რაამმა კი - 4. ბოლო ორი პარტია ჯერჯერობით არც ერთ კოალიციას არ უერთდება.
ისრაელის ქნესეთში სულ 120 ადგილია. მთავრობის ფორმირებისთვის საჭიროა, მინიმუმ, 61 ადგილი.
ასევე 3 მარტს, ისააკ ჰერცოგი ისრაელის მე-11 პრეზიდენტი გახდა და პარლამენტში 2/3-ზე მეტი ხმა მოიპოვა. მანამდე ქვეყნის პირველი პირი 7 წლის განმავლობაში იყო რუვენ რივლინი, რომელიც თანამდებობას მომდევნო თვეში დატოვებს.
აღსანიშნავია, რომ ისრაელის პრემიერმინისტრის, ნეთანიაჰუს პარტიას საპრეზიდენტო კანდიდატი არ წარუდგენია და არც რომელიმესთვის მიუცია ხმა.
თავის გამოსვლაში ჰერცოგმა თქვა, რომ ის შეეცდება, გააერთიანოს ისრაელის საზოგადოება, განსაკუთრებით საზოგადოების შიგნით ბოლოდროინდელი ძალადობრივი მოვლენების შემდეგ.
Tabula.ge
ნეთანიაჰუ
