12 წლიანი ლოდინის შემდეგ, Georgian Airways-ის დამფუძნებელი თბილისში,5-ვარსკვლავიანი სასტუმროს მშენებლობას ვერ იწყებს. თამაზ გაიაშვილი „კომერსანტთან“ აცხადებს, რომ მიზეზი მუნიციპალიტეტში არსებული ბიუროკრატიული ბარიერებია.
როგორც გაიაშვილმა აღნიშნა,სამშენებლო ნებართვის მიღებას კომპანია ყოველდღიურ რეჟიმში ელოდება. მას შემდეგ კი, რაც პროექტი დამტკიცდება, მშენებლობაც დაიწყება, რომელსაც სამშენებლო კომპანია „ანაგი“ განახორციელებს.
შესაბამისად, სასტუმროების სექტორში ახალი Four Seasons ბრენდის სასტუმრო გაჩნდება. სასტუმროს მშენებლობა რუსთაველის 12 ნომერში იგეგმება და პროქტის საინვესტიციო ღირებულება 70 მილიონ დოლარს შეადგენს.
როგორც ცნობილია, რუსთაველის 12 ნომერში სასტუმროს ესკიზის წინასწარ შეთანხმებაზე ნებართვა კულტურული მემკვიდრეობის დაცვის საბჭომ გასცა. დასკვნაში ნათქვამია, რომ ამ ეტაპზე განიხილებოდა, თუ რამდენად შეესაბამება შენობის ვიზუალური მხარე არსებულ განაშენიანებას და ისტორიულად ჩამოყალიბებულ გარემოს. ესკიზის განმარტებით ბარათში ვკითხულობთ, რომ იცვლება შენობის ფორმა. კერძოდ, შენობის ხისტი კუთხე წრიული ფორმითაა ჩანაცვლებული, რაც განმცხადებლის თქმით, არბილებს უკრაინკის ქუჩასა და რუსთაველის გამზირს შორის ბმას. შენობის მოცულობა კი ინარჩუნებს ისტორიული განაშენიანების მასშტაბებს. განმარტებით ბარათში წერია, რომ სასტუმროს შენობა შერწყმული იქნება რუსთაველის გამზირზე არსებულ გარემოსთან.
თანამედროვე სტანდარტების მქონე, 5–ვარსკვლავიანი სასტუმრო Four Seasons Hotel Georgia-ს აშენების შესახებ ინფორმაცია 2015 წელს სასტუმროს ფეისბუქის გვერდზე გავრცელდა.
სოფო ქსოვრელი