2022-ში მდიდარმა ადამიანებმა არა მილიონები, ბილიონები დაკარგეს. The Richest-ი 10 მილიარდერის სიას აქვეყნებს, რომლებმაც 2022 წელს ყველაზე დიდი ზარალი ნახა.

1. სიის ბოლოში ბილ გეიტსია. მთავარი მიზეზი, რის გამოც ოდესღაც უმდიდრესმა კაცმა მსოფლიოში, 101 მილიარდი დოლარის ქონებიდან, მილიარდები დაკარგა - ქველმოქმედებაა. მან საქველმოქმედო ორგანიზაციებს დაახლოებით 27,3 მილიარდი დოლარი გადასცა და, როგორც ჩანს, ამას საერთოდ არ განიცდის, პირიქით - ივლისში გეიტსმა ტვიტერზე დაწერა, რომ მთელ თავის ფულს ქველმოქმედებას მოახმარს.

2. ბოლოდან მეორე ნომერი L'Oréal-ის დამფუძნებლის შვილიშვილი და კომპანიის აღმასრულებელი დირექტორი - ფრანსუაზა ბეტანკურ მაიერსია. მან წელს 30,7 მილიარდი დოლარი დაკარგა. ეს დანაკარგი ოქტომბერში საფონდო ბირჟაზე L'Oréal-ის აქციების მასიურმა ვარდნამ გამოიწვია. ისიც ითქვა, რომ Covid-19-მა და ლოკდაუნმა დიდი გავლენა მოახდინა კომპანიის აქციების ფასის დაცემაზე.

3. შემდეგი - მაკკენზი სკოტია, მისი ასაკის ერთ-ერთი ყველაზე ცნობილი ფილანთროპი. სკოტის ფინანსური დანაკარგებიც ქველმოქმედებას უკავშირდება. მან Amazon-ის დამფუძნებელ ჯეფ ბეზოსთან განქორწინების შემდეგ Amazon-ის 25% მოიპოვა. მაკკენზი სკოტმა წელს დაახლოებით 31,7 მილიარდი დოლარი დაკარგა.

4. სერგეი ბრინი Google-ის ერთ-ერთი დამფუძნებელი და გამგეობის წევრია. 2022 წელს მან $38,1 მილიარდი დაკარგა.

5. ფრანგული ტრანსნაციონალური კომპანია Louis Vuitton Moët Hennessy-ის მფლობელმა, ფრანგმა მაგნატმა ბერნარ არნომ წელს $38,2 მილიარდი იზარალა. Louis Vuitton Moët Hennessy-ის (LVMH) შემადგენლობაში შედის: Christian Dior-ი, Louis Vuitton-ი, Givenchy-ი, Guerlain-ი, Moët & Chandon-ი, Hennessy-ი და მთლიანობაში 75 დიდი კომპანია.

6. სერგეი ბრინთან ერთად, Google-ის ერთ-ერთი დამფუძნებელია ლარი პეიჯი. ორივე მათგანი იმ მილიარდერთა სიაში მოხვდნენ, რომლებმაც 2022 წელს უზარმაზარი ქონება დაკარგეს. Alphabet-ის შეუსრულებელი მიზნებისა და YouTube რეკლამის შემოსავლის შემცირების შედეგად, ამერიკელმა ბიზნესმაგნატმა და ინტერნეტ მეწარმემ $39,2 მილიარდი დაკარგა.

7. პანდემიის პერიოდში, ონლაინ შოპინგის დაწყების შემდეგ, Amazon-ის აღმასრულებელი დირექტორი ჯეფ ბეზოსი ერთ-ერთი ყველაზე მდიდარი ადამიანი გახდა. მაგრამ წლების შემდეგ Amazon-ის ღირებულება დაეცა და წელს ჯეფ ბეზოსმა $65,7 მილიარდი დაკარგა.

8. მასკი სიაში მესამე ადგილს იკავებს. მისი ცნობილი კომპანიის Tesla-ს ღირებულება მხოლოდ მიმდინარე წელს დაახლოებით 43%-ით დაეცა. დიდი ზარალი ნახა მასკმა Twitter-ის 44 მილიარდ დოლარად შეძენის შედეგი. Tesla-ს აქციების ფასის კლება მას 2022 წელს $66,4 მილიარდი დაუჯდა.

9. ჩანგპენგ ჟაო კანადაში ჩინელი ემიგრანტია, მაგრამ მას მსოფლიოში Binance-ის შემქმნელად იცნობენ. ჟაოს მძიმე დარტყმა მიაყენა 2022 წელს კრიპტოვალუტების ბაზრის ვარდნამ. ჟაომ, რომლის ქონებაც ოდესღაც $96 მილიარდი იყო, ჯამში $72,6 მილიარდი დაკარგა.

10. Facebook-ის აღმასრულებელი დირექტორი და დამფუძნებელი მარკ ცუკერბერგი 2015 წლის შემდეგ პირველად ამოიღეს 10 უმდიდრესი ამერიკელის სიიდან და პირველ ადგილზეა მილიარდერებს შორის, რომლებმაც წელს დიდი ქონება დაკარგა. Forbes-ის ცნობით, Meta-ს აქციების ფასი 57%-ით დაეცა, რამაც ცუკერბერგს 87,3 მილიარდი დოლარის ოდენობის ზარალი მოუტანა.

მოამზადა მაკა ბიბილაშვილმა