ბანკებში ფიზიკური პირების დეპოზიტების ლარიზაციის მაჩვენებელი 25%-ზე ნაკლებია. მიუხედავად იმისა, რომ ლარში განთავსებულ ანაბარს თითქმის 10-ჯერ მეტი საპროცენტო სარგებელი ერიცხება და 6 თვეში 5%-ით გამყარდა, ეროვნული ვალუტის მიმართ ნდობა კვლავ დაბალია.

მიმდინარე წლის პირველ 6 თვეში ლარში განთავსებული ანაბრის მთლიანი მოცულობა (ფიზიკური და იურიდიული პირები) 1.047 მლრდ-ით 13.903 მლრდ-მდე გაიზარდა, უცხოურ ვალუტაში კი 235 მლნ-ით 21.385 მლრდ-მდე შემცირდა, რისი მთავარი მიზეზიც ლარის გამყარება გახდა.

ეროვნული ბანკის ანგარიში მოიცავს როგორც ვადიან დეპოზიტებს, ასევე შემნახველ ანაბრებსა და მიმდინარე ანგარიშებს. ლარში ყველაზე მეტად 729 მლნ-ით 4.261 მლრდ-მდე მიმდინარე ანგარიში გაიზარდა. მკვეთრად, 300 მლნ-ით 2.835 მლრდ-მდე გაიზარდა 1 წელზე მეტი ვადის მქონე ანაბრების მოცულობაც.

უცხოურ ვალუტაში პირიქით, მიმდინარე ანგარიშები $369 მლნ-ით 4.987 მლრდ-მდე, 1 წელზე მეტი ვადის მქონე ანაბრების კი 389 მლნ-ით 4.763 მლრდ-მდე შემცირდა. ვარდნა მეტ-ნაკლებად მოთხოვნამდე დეპოზიტების 364 მლნ-ით 6.602 მლრდ-მდე ზრდამ დააბალანსა.

მხოლოდ ფიზიკური პირების სადეპოზიტო პორტფელი საერთო სურათისგან განსხვავდება. ფიზიკური პირების მიერ უცხოურ ვალუტასი განთავსებული ანაბრების მოცულობა მიმდინარე წელს 519 მლნ-ით 14.122 მლრდ-მდე გაიზარდა. თუ მთლიან ანაბრებსი ლარიზაციის მაჩვენებელი 40%-ს აღწევს, ფიზიკურ პირებში ის 25%-ზე ნაკლებია.

ივნისში ფიზიკური პირებისთვის ლარში განთავსებულ დეპოზიტზე დარიცხული საპროცენტო სარგებელი 10.8%-მდე გაიზარდა, უცხოურ ვალუტაში 1.1%-მდე შემცირდა. იმავე პერიოდს დაემთხვა ლარის გამყარებაც. ამ ყველაფრის მიუხედავად, რადგან მოსახლეობის უდიდეს ნაწილს ლარის მიმართ ნდობა არ გააჩნია, დეპოზიტარების 3/4  10-ჯერ ნაკლებ, მაგრამ უფრო სტაბილურ სარგებელს ირჩევს. 2013-2020 წლებში 2017 ერთადერთი გამონაკლისი იყო, როდესაც 1-ელ იანვარს დოლარი უფრო ძვირი ღირდა ვიდრე 31 დეკემბერს. გაუფასურების წლიური ტემპი 15 და 20 პროცენტსაც გადასცდენია, რაც იმდენად დიდია, რომ მაღალ საპროცენტო სარგებელს მთლიანად აზრს უკარგავს და დოლარებში გადაყვანით ძირ თანხას ამცირებს. 2020 წელს ლარი 14.3%-ით გაუფასურდა. 1-ელ იანვარს 1000 ლარი $349-ს უდრიდა, 31 დეკემბერს $305-ს. პირობითად 10.5%-იანი სარგებლის შემთხვევაში 1105 ლარი $337 იქნებოდა, ანუ ძირ თანხაზე $13-ით ნაკლები. ასეთ შემთხვევაში 0%-იანი სარგებელიც კი დოლარში უფრო მომგებიანი იქნებოდა, ვიდრე 10.5%-იანი სარგებელი ლარში.