ჯანდაცვის სამინისტრომ COVID 19-თან დაკავშირებული რეკომენდაციების დარღვევის გამო, 31 კვების ობიექტი, 3 სასტუმრო და 2 ივენთი დააჯარიმა. ჯარიმის ოდენობა თითოეული ობიექტისთვის 10 000 ლარია.
„სასტუმროებისა და რესტორნების ფედერაციის“ დამფუძნებელი შალვა ალავერდაშვილი „კომერსანტთან“ საუბრისას აღნიშნავს, რომ ისედაც ძალიან ცუდ მდგომარეობაში მყოფი ბიზნესების ასეთი სახით დაჯარიმებამ შესაძლოა სექტორი გაანადგუროს.
„შეგვიძლია ამ საქციელის გამო ჯანდაცვის სამინისტროს ტაში დავუკრათ და ვუთხრათ თუ რა მაგრები არიან. როცა ამ რეგულაციების შეთანხმება მიმდინარეობდა, მეც ვიყავი ჩართული და გარკვევით იყო ნათქვამი, რომ ობიექტებს მითითებები მიეცემოდათ და მათი ასე ხელაღებით დაჯარიმება არ მოხდებოდა. როცა ობიექტს ამოწმებ, პირველ შეხვედრაზე უნდა მიუთითო შეცდომებზე, აქ საუბარია ძალიან მინიმალურ დარღვევებზე და ვფიქრობ, რომ ასეთი მკაცრი ზომების მიღება მცირე შეცდომებზე, უბრალოდ შოუს ნაწილია. კარგი იქნებოდა ჯანდაცვის სამინისტრო უფრო გაგებით მოეკიდოს ისედაც მძიმე სიტუაციაში აღმოჩენილ ობიექტებს. თავის მხრივ არც ბიზნესს ვამართლებ, მათაც უნდა აიღონ ვალდებულება და ყველა რეკომენდაცია უნდა შეასრულონ.
აღსანიშნავია, რომ სანამ ობიექტი გახსნის უფლებას მიიღებს, მანამდე მათი შემოწმება ხდება, ამიტომ ამ დროს გარკვევით უნდა მიეთითოს, რა და როგორ გააკეთონ და მხოლოდ ამის შემდეგ მოხდეს მათი შემოწმება. რეალურად ნამდვილად არ მივესალმები ისედაც ძალიან ცუდ მდგომარეობაში მყოფი ბიზნესების ასეთი სახით დაჯარიმებას, რადგან ამ ფაქტმა სექტორი შესაძლოა სულ გადატეხოს. არსებული 10 000 ლარი, საკმაოდ მძიმე ჯარიმაა მათთვის და ამიტომ ჯანდაცვის სამინისტროს მოვუწოდებ უფრო ლოიალურები იყვნენ და ამ საქციელით ნუ ამაყობენ. მსოფლიოში, ასეთი მაღალი ჯარიმები არავის არ აქვს. სპეციალურად მოვიძიეთ ეს ინფორმაცია და აღმოჩნდა, რომ მსოფლიოს არც ერთ ქვეყანას 10 ათას ლარიანი ჯარიმა არ აქვს, მითუმეტეს პანდემიის პირობებში“, - განაცხადა შალვა ალავერდაშვილმა.
მისივე განცხადებით, პანდემიის შედეგად შექმნილი ვითარების გამო ტურიზმის ინდუსტრიაში 280 000-მდე ადამიანი უმუშევარი დარჩა. რაც შეეხება საზღვაო კურორტებს, ალავერდაშვილის ამბობს, რომ 1996-1997 წლების პერიოდში დაბრუნდა საზღვაო კურორტები და სულ რამოდენიმე მცირე სასტუმრო მუშაობს. გარდა ამისა, ტურიზმის ინდუსტრია საბანკო სესხების გადავადებას 1 წლით ითხოვს.
ნინო თამაზაშვილი