საქართველოს მოსახლეობის დიდი ნაწილი, 1 მილიონამდე ადამიანი, ეკონომიკურ პროცესებში არ მონაწილეობს. ამ მხრივ სიტუაცია არც 2020 წლამდე იყოს სახარბიელო, თუმცა კორონავირუსის პანდემიამ საგრძნობლად დაამძიმა. მიუხედავად იმისა, რომ მიმდინარე წლის მეორე კვარტალში მდგომარეობა შედარებით გამოსწორდა და ეკონომიკურად პასიური ადამიანების რაოდენობა რამდენიმე ათასი ერთეულით შემცირდა, მდგომარეობა რეალურად მძიმე დარჩა.
როგორც სტატისტიკოსი სოსო არჩვაძე ,,კომერსანტთან“ აცხადებს, ეკონომიკის კონიუნქტურის გაუმჯობესებამ 112 000-ით გაზარდა სამუშაო ძალა, რამაც შრომის ბაზარზე გარკვეული პოზიტიური გავლენა მოახდინა. კერძოდ, უმუშევრობა მატულობს, მაგრამ დასაქმებაც 3-ჯერ გაზრდილია.
,,საქართველოს ჰყავს მილიონი მოქალაქე, რომელიც ეკონომიკურად არის არააქტიური. ამაში შედიან 15 წელს ზემოთ ადამიანები, რომლებიც არ არიან დასაქმებულები და არც ეძებენ სამუშაოს. ეს შეიძლება იყოს დიასახლისი, შშმ პირი, სტუდენტები, პენიტენციურ დაწესებულებებში მყოფი ადამიანები, მსახურები, რომლებიც კელია-მონასტრებში ცხოვრობენ, ყაზარმულ მდგომარეობაში მყოფი ჯარისკაცები და სხვა, რომელთა რაოდენობა ჯამში გვაძლევს ეკონომიკურად არააქტიურ მოსახლეობას. 2021 წლის მეორე კვარტალში, პირველ კვარტალთან შედარებით, ეკონომიკურად აქტიური მოქალაქეების რაოდენობა გაიზარდა. ვინც არ ცდილობდა სამუშაოს მოძიებას, ეკონომიკური სიტუაციის გაუმჯობესების კვალობაზე, გადაწყვიტეს ეცადათ ბედი და დაიწყეს სამუშაოს ძებნა ანუ გაიზარდა ეკონომიკურად აქტიური მოქალაქეების რაოდენობა არააქტიურთ შემცირების ხარჯზე. პირობითად, თუკი დიასახლისი საშინაო საქმეებით იყო დაკავებული, ახლა ჩათვალა, რომ სამსახურში დაკავდეს ან თავისი ბიზნესი წამოიწყოს. ასეთი მაგალითების ხარჯზე, 112 000-ით გაიზარდა სამუშაო ძალა, აქედან 85 000-ით გაიზარდა დასაქმებულთა რაოდენობა და 27000-ით უმუშევართა რაოდენობა“, - განმარტავს არჩვაძე.
მისი თქმით, დასაქმების ზრდა ეკონომიკის გაჯანსაღებამ გამოიწვია და ტრენდი რომ შენარჩუნდეს, მთავრობამ ხელი უნდა შეუწყოს პროფესიული გადამზადების, კვალიფიკაციის ამაღლების, პროფილის შეცვლის და რიგ სხვა ღონისძიებებს, რის გავლენითაც გაიზრდება ეკონომიკურად აქტიური მოსახლეობის რაოდენობა და შემცირდება არააქტიური.
შრომის ბაზარზე არსებული ვიტარების საილუსტრაციოდ საინტერესოა კვლევა ცოტა ხნის წინ PMC -მა გამოაქვეყნა.
კვლევითი ცენტრი BAG-თან ერთად ყოველკვარტალურ გამოკითხვას ატარებს და დასაქმების ბარომეტრს აქვეყნებს.
როგორც კვლევაშია აღნიშნული, 2021 წლის მესამე კვარტალის მოლოდინები უფრო პოზიტიურია, ვიდრე მეორე კვარტალში დაფიქსირებული ცვლილებები. გამოკითხული კომპანიების 31.4% დასაქმებულთა რაოდენობის ზრდას ელის 2021 წლის მესამე კვარტალში, 64.7% ცვლილებას არ გეგმავს, ხოლო შემცირებას მხოლოდ 3.9% აპირებს.