ძლიერმა მიწისძვრამ, რომელიც დღეს დილით თურქეთის სამხრეთ აღმოსავლეთ ნაწილში მოხდა ქვეყნის ენერგეტიკულ ინფრასტრუქტურას სერიოზული ზიანი მიაყენა - ამის შესახებ ენერგეტიკისა და ბუნებრივი რესურსების მინისტრმა ფაჰიტ დონმესმა განაცხადა.
დონმესმა აღნიშნა, რომ სერიოზულად დაზიანდა ელექტროენერგიისა და ბუნებრივი აირის გადამცემი და გამანაწილებელი ხაზები, მისივე თქმით ყველაზე მეტად დაზიანდა ბუნებრივი აირის მაგისტრალური გადამცემი მილსადენი, რომელიც ეპიცენტრთან ახლოს კაჰრამანმარაშის თურქოღლუს რაიონში მდებარეობს.
„ეს არის ჩვენი მთავარი მილსადენი, რომელიც ბუნებრივ აირს გაზიანთეპში, ჰატაიში და კილისში, განსაკუთრებით კი კაჰრამანმარაშში ატარებს. ამ დროისთვის ამ ადგილებზე შესაძლოა ელექტროენერგია და ბუნებრივი აირის მიწოდება შეიზღუდოს . სპეციალური ჯგუფები დაზიანებული ხაზების შეკეთებაზე მუშაობენ, სხვადასხვა ხარისხის დაზიანება აქვს თურქეთის ელექტროგადამცემი კორპორაციის (TEIAŞ) კუთვნილი დაახლოებით 30 ქვესადგურს“ - აღნიშნა ფაჰიტ დონმესმა
ენერგეტიკის სამინისტროს წარმომადგენელმა reuters უთხრა, რომ მიწისძვრას ბაქო-თბილისი-ჯეიჰანის მილსადენი არ დაუზიანებია, თუმცა ჩრდილოეთ ერაყის ავტონომიურმა ქურთულმა რეგიონმა განაცხადა, რომ თურქეთის პორტ ჯეიჰანში ნავთობის მიწოდება დროებით შეჩერებულია.
„თურქეთსა და სირიაში მომხდარი მიწისძვრის გამო და ნავთობის ექსპორტის უსაფრთხოების უზრუნველსაყოფად და არასასურველი ინციდენტების თავიდან ასაცილებლად, ნავთობის ექსპორტი ქურთისტანის რეგიონის თურქეთთან დამაკავშირებელი მილსადენით შეჩერებულია“, - განაცხადა რეგიონის ბუნებრივი რესურსების სამინისტრომ.