საგანგებო სიტუაციების საქალაქო სამსახური დღეს საგანგებო რეჟიმში იმუშავებს. სამსახურის უფროსის თემურ გიორგაძის განცხადებით დღეს ძლიერი წვიმის გამო, შესაძლოა, წყალდიდობები და ნგრევები იყოს.
ძლიერი წვიმის გამო წუხელ ნაძალადევის რაიონში მეწყერი ჩამოწვა. შემთხვევა მომცელიძის ქუჩაზე, 33 ნომერში მოხდა. მსხვერპლი არ არის, თუმცა ფერდობიდან ჩამოწოლილმა მიწამ ერთი სახლი დააზიანა. საგანგებო სიტუაციათა სამსახურის თანამშრომლები ადგილზე რამდენიმე საათის განმავლობაში მუშაობდნენ. მომცელიძის ქუჩაზე იმყოფებოდა გლდანი-ნაძალადევის რაიონის გამგებელიც.
შეგახსენებთ, დღეს სინოპტიკოსები ყველაზე დიდ ნალექს ელიან. გარემოს დაცვის მინისტრის განცხადებით, ნაპირსამაგრი სამუშაოები უკვე ჩატარებულია და სამინისტრო სტიქიას მომზადებული ხვდება.
|
