საინვესტიციო სააგენტოს ხელმძღვანელი ფრანგ დიპლომატს არ ეთანხმება
რადიო ``კომერსანტი,`` FM 95,5
უცხოელი ინვესტორები სკეპტიკურად არიან განწყობილნი, ვინაიდან არ ესმით საგადასახადო ინსპექციის თანამშრომლების მათდამი მოკირკიტე დამოკიდებულება - აცხადებს საფრანგეთის ელჩი საკუთარ მიმართვაში, რომელსაც დღეს გაზეთი "რეზონანსი" აქვეყნებს.
ერიკ ფურნიე ამბობს, რომ სოფლის მეურნეობა საქართველოს ერთ-ერთ უმთავრეს კოზირად რჩება, თუმცა სექტორში გრძელვადიანი შედეგების დანახვა რთულია.
მისივე თქმით, 15 ივლისს ევროკავშირმა საქართველოსთან ასოცირებული შეთანხმების გაფორმებაზე დაიწყო მოლაპარაკებები. ევროკომისიის ვიცე-პრეზიდენტი კეტრინ ეშტონიც ბათუმს სპეციალურად ამ მიზნით ეწვია. თუმცა, დიპლომატის თქმით, მიზნის მისაღწევად და ინვესტორების დასაბრუნებლად კერძოდ სოფლის მეურნეობის დარგში - საჭირო იქნება შრომის კოდექსის გაუმჯობესება, გამჭვირვალეობა ადმინისტრაციული გადაწყვეტილებების მიღებისას, ფულადი სახსრების წარმომავლობის საკითხში და საგადასახადო პროცედურებში.
ერიკ ფურნიე დასძენს, რომ ფიტო-სანიტარული კონტროლის ნორმების დაცვის გარეშე ტურისტებს უსაფრთხოების გარანტია არ ექნებათ.
საინვესტიციო სააგენტოს ხელმძღვანელი ინვესტორების სკეპტიკურ განწყობას უარყოფს. ირაკლი მატკავა ამბობს, რომ ბოლო პერიოდში ინვესტორების განწყობა შეიცვალა და ისინი უფრო მეტად ეძებენ ახალ შესაძლებლობებს საქართველოში. რაც შეეხება შრომის კოდექსის გაუმჯობესებას, ფიტო-სანიტარულ კონტროლს და გამჭვირვალობას ადმინისტრაციული გადაწყვეტილებების მიღებისას და საგადასახადო პროცედურებში, ეს ყოველივე ევროკავშირთან ასოცირებული შეთანხმების გასაფრომებლადაა საჭირო და ქვეყანამ ამისათვის მუშაობა უკვე დაიწყო, თუმცა, მატკავას განცხადებით, ამ მიმართულებით საგანგაშო მდგომარეობა ქვეყანაში არ არის.
|
