geo eng rus
პარასკევი, 24 მარტი, 2017. 06:05
თბილისის განვითარების ფონდმა რუსთაველის გამზირზე ორი ისტორიული შენობის რესტავრაცია დაასრულა
2017-01-09 13:00:00
+
-

თბილისის განვითარების ფონდმა შოთა რუსთაველის გამზირ N 14 და N16 - ში მდებარე ისტორიული შენობების რეაბილიტაცია - რესტავრაცია დაასრულა. ფონდის ინფორმაციით, სამუშაოები პროექტ „ახალი ტფილისის" ისტორიულ-კულტურული ძეგლების და სხვა შენობების რეაბილიტაციის პროგრამის ფარგლებში განხორციელდა.

 

 

 

ფონდის ცნობით, შოთა რუსთაველის გამზირ N16 -ში განხორციელდა შემდეგი სამუშაოები:

 

 

 

 

 

 

 

• აღდგა ფასადის დაზიანებული ადგილები;

 

 

 

 


• რესტავრაცია ჩაუტარდა სადარბაზოს ხის კარებებს;

 

 

 


• ფასადის გასწვრივ მთელს პერიმეტრზე გამოიცვალა დაზიანებული თუნუქის სახურავი;

 

 

 

შოთა რუსთაველის გამზირ N14-ში შემდეგი სამუშაოები ჩატარდა :

 

 

 

 

 

 


• რესტავრაცია ჩაუტარდა ეზოს ლითონის ჭიშკარს და სადარბაზოს ძველებურ ხის კარებებს ;

 

 


• აღდგა ფასადის მხატვრული დეტალები, ძეგლზე მუშაობის მეთოდოლოგიის დაცვით;

 

 

 

 

 

 


• ნაგებობის შემომზღუდავი დაბალი კედლის გასწვრივ გამოიცვალა თუნუქის სახურავი;

 

 


შოთა რუსთაველის გამზირისა და ბესიკი ქუჩების კუთხეში, რუსთაველის გამზირ N14 -ში მდებარე სამსართულიანი შენობა XIX საუკუნის მეორე ნახევარში აშენდა. ცნობილია, რომ 1848 წელს გოლოვინის პროსპექტზე იაკობ ზუბალაშვილის სახლში „შარლის სასტუმრო" ამოქმედდა, რომელიც მალევე დაიხურა. ეს სასტუმრო, ზუსტად ამ ადგილას, ახლანდელი რუსთაველის პროსპექტის N14-ში მდებარეობდა. რუსთაველის N14-ში მდებარე შენობას „არტ ნუვოს „ სტილის მორთულობები ამშვენებს, მათგან აღსანიშნავია ყვავილების ვრცელი ბარელიეფი, რომელიც ფასადს მთელ პერიმეტრზე მიუყვება.

 

 

 

 

 

 

 

რუსთაველის გამზირ N16-ში მდებარე ისტორიული შენობა 1916 წელს თბილისის „არტისტული წრისთვის" არქიტექტორ დავით ჩისლიევის პროექტით აშენდა. 1918 წლიდან ნაგებობის სარდაფში გაიხსნა იმ პერიოდის თბილისში საკმაოდ პოპულარული, ბოჰემური ტიპის სტუდია "არგონავტების ნავი". სტუდია აკმეისტების (პოეტთა თბილისური გილდია) შეხვედრის ადგილს წარმოადგენდა. აქ მოდიოდნენ პოეტები, კომპოზიტორები, ჟურნალისტები, მხატვრები და სხვ.

 

 

 

კაფე "არგონავტთა ნავი" მხატვრებმა კირილ ზდანევიჩმა, ლადო გუდიაშვილმა და ალექსანდრე ბაჟბეუქ - მელიქოვმა მოხატეს.

 

 

 

 

 

 

 

საბჭოთა ხელისუფლების პერიოდში აქ განთავსებული იყო ამიერკავკასიის სამხედრო ოლქის ოფიცერთა სახლი კინოს დარბაზით. ბოლო წლებში, კი სხვადასხვა კულტურული დაწესებულებები - გალერეა, ასევე საქართველოს ხალხური სიმღერისა და ცეკვის სახელმწიფო აკადემიური ანსამბლი "ერისიონი" და სხვა.

 

 

 

ნაგებობა აღრიცხულია ეროვნული მნიშვნელობის არქიტექტურულ ძეგლად და მიჩნეულია თბილისის საზოგადოებრივ ნაგებობათა შორის ერთ-ერთი საუკეთესოდ. საინტერესოა იგი თავისი საფასადო სახით და ინტერიერის მხატვრული გაფორმებითაც. შენობა ევროპული ნეოკლასიციზმის ნიმუშს წარმოადგენს, სადაც გამოყენებულია ასევე რენესანსისა და ბაროკოს სტილისათვის დამახასიათებელი ნიშნები.

 

 

 

რუსთაველის გამზირ N14-16-ში მდებარე ისტორიული შენობების რესტავრაცია-რეაბილიტაციის სამუშაოები თბილისის განვითარების ფონდმა 2016 წლის ივლისში დაიწყო და წლის ბოლოს დაასრულა.