ბიზნესი და ინვესტიციები – თბილისის მერობის კანდიდატების წინასაარჩევნო ხედვა

access_time2017-10-13 17:00:00

თვითმმართველობის არჩევნებამდე რამდენიმე დღით ადრე აღმოსავლეთ ევროპის მრავალპარტიული დემოკრატიის ცენტრმა სპეციალური  კვლევა ჩაატარა. კვლევის ფარგლებში  მერობის კანდიდატებმა ორგანიზაციის მიერ შედგენილ კითხვარს უპასუხეს, რის შემდეგაც დაპირებები პოლიტიკის ექსპერტებმა შეაფასეს. შედეგები კი, ვებ- გვერდზე partiebi.ge განთავსდა. მიზეზი ამომრჩევლისთვის ინფორმირებული გადაწყვეტილების მიღების გაიოლებაა.

 

 

„კომერსანტი“ გთავაზობთ თბილისის მერობის კანდიდატების ხედვებს იმასთან დაკავშირებით, თუ როგორ უნდა განვითარდეს დედაქალაქში ბიზნესი და როგორ უნდა მოხდეს ინვესტიციების მოზიდვა. (წყარო: partiebi.ge)

 

 

გიორგი ვაშაძე, „ახალი საქართველო“: „XXI საუკუნის ეკონომიკა წარმოუდგენელია ინოვაციური ტექნოლოგიების განვითარების გარეშე. ტექნოლოგიები იძლევა საშუალებას გასცდე ქალაქისა თუ ქვეყნის გეოგრაფიულ საზღვრებს და საკუთარი პროდუქტი მსოფლიოს შესთავაზო. მცირე მოსახლეობისა და დაბალი მსყიდველობითი უნარის მქონე ქვეყნების ეკონომიკებისათვის უდიდეს გამოწვევას წარმოადგენს ინოვაციური ტექნოლოგიების გამოყენებით შექმნილი საერთაშორისო პროექტები. თბილისი უნდა იქცეს ინოვაციური სტარტაპების ჰაბად. ამ მიზნით, ქალაქის ადმინისტრაციისა და საერთაშორისო სტარტაპ ფონდების თანამშრომლობით გაიმართება ყოველწლიური ფორუმი ინოვაციური პროექტების გამოსავლენად“.

 

ელენე ხოშტარია, „ევროპული საქართველო“: “ევროპული საქართველო” ბიზნესის ხელშეწყობისთვის ქონების გადასახადს 10%-ით შეამცირებს. „საჯარო-კერძო პარტნიორობის შესახებ“ (Public-Private Partnership) “ევროპული საქართველოს” ინიციატივის ფარგლებში, თბილისის მერია აქტიურად ჩაერთვება კერძო სექტორისთვის გარკვეული გარანტიების მიცემაში, რისკების გადანაწილებასა და ბიზნესშესაძლებლობების გაფართოებაში.

 

განახლდება ქალაქის ისტორიული უბნების - მაგალითად, მეტეხის უბნის, ხარფუხის, მაჭრისხევის - რეაბილიტაცია და იქ ტურისტული ინფრასტრუქტურის შექმნა. ტურისტულად მიმზიდველ უბნებში არსებული შენობა-ნაგებობების რეაბილიტაციით, მათ მესაკუთრეებს გაუჩნდებათ შესაძლებლობა, წამოიწყონ ბიზნესი და შექმნან ახალი სამუშაო ადგილები ისევე, როგორც ეს მოხდა კალაუბნის, აბანოთუბნის, აღმაშენებლის გამზირის რეაბილიტაციის შემდეგ.

 

ქალაქში ინფრასტრუქტურული პროექტების განხორციელებისას განსაკუთრებული ყურადღება მიექცევა საფეხმავლო სივრცეების მოწესრიგებას იმგვარად, რომ პროექტის დასრულების შემდეგ, შესაძლებელი იყოს რეაბილიტირებულ სივრცეებში ახალი მცირე ბიზნესების შექმნა (პატარა კაფეები, ატრაქციონები ბავშვებისთვის, სავაჭრო დახლები, მოწესრიგებული გარევაჭრობის ადგილები), რაც ქალაქში დამატებით ათასობით სამუშაო ადგილს გააჩენს.

 

აღსანიშნავია ისიც, რომ საბჭოთა კავშირის დაშლის შემდეგ, მსხვილი ინდუსტრიული საწარმოები ქალაქის ფართობის 17,4%-ს იკავებდა. მათი დიდი ნაწილი დაიხურა, რამაც განაპირობა ქალაქის ფარგლებში უფუნქციო ტერიტორიების, ე.წ. “ბრაუნფილდების” გაჩენა. მოცემული ადგილების გამოყენება შესაძლებელია როგორც კომერციული, ასევე მუნიციპალური პროექტებისათვის, მათ შორის, სარეკრეაციო ზონების, საზოგადოებრივი სივრცეების, სოციალური ინფრასტრუქტურის მოსაწყობად. თბილისში „ბრაუნფილდები“ ქალაქის თითქმის მთელს სიგრძეზე, მტკვრისა და რკინიგზის დერეფნის გასწვრივაა განლაგებული. ისინი იწვევენ ქალაქის სტრუქტურის ფრაგმენტაციას და უარყოფითად მოქმედებენ მიმდებარე ტერიტორიების განვითარების პოტენციალზე. მოცემული პრობლემის მოგვარება გააჩენს ახალ შესაძლებლობებს თბილისის მაცხოვრებლებისთვის, რაც დადებითად აისახება თითოეული მოქალაქის კეთილდღეობაზე“.

 

 

ზაალ უდუმაშვილი, „ნაციონალური მოძრაობა“: „თბილისი უნდა ვაქციოთ უსაფრთხო და კომფორტულ ქალაქად. შესაბამისად, ვგეგმავთ აღნიშნული მიმართულებით მუშაობას. კომფორტული გარემო უკვე ნიშნავს ბიზნესის სტიმულირებას, რაც ახალ,  ეკონომიკურად აქტიურ ზონებს, ინვესტორების წახალისებას და სპეციალური საინვესტიციო პროექტების შეთავაზებას გულისხმობს. ჩვენ ვფიქრობთ, რომ შევიმუშაოთ ახალი საინვესტიციო პროექტები. ერთ-ერთი ასეთი პროექტია შემოვლითი რკინიგზის ადგილის განვითარებისა და დასაქმების ახალ ზონად გარდაქმნა. გამოთავისუფლებულ ტერიტორიაზე ვგეგმავთ  მაგისტრალური ზონის განვითარებას, დაინტერესებული პირებისათვის უფასო პროექტების შეთავაზებას მცირე ბიზნესის წამოსაწყებად და აღნიშნულ ზოლზე ქონების გადასახადის გაუქმებას სამი წლის ვადით“.

 

 

თენგიზ შერგელაშვილი, „შენების მოძრაობა“: „თბილისში თანაბრად უნდა ვითარდებოდეს ცენტრიც და გარეუბნებიც. ჩვენ დავნერგავთ კერძო სექტორის მასტიმულირებელ ღონისძიებათა ერთობლიობას (პაკეტს) იმისათვის, რომ ქალაქის ყველა უბანში გაჩნდეს მუნიციპალური სერვისები, ბიზნესის განვითარებისა და დასაქმების არეალები, სავაჭრო ცენტრები, საბანკო მომსახურების დაწესებულებები, სპორტული, გასართობი და გამაჯანსაღებელი ობიექტები.

 

ჩვენ თბილისის ბიუჯეტიდან ბიზნესის სტიმულირებისთვის გამოვყოფთ მცირე ბიზნესის განვითარების ფონდს. ფონდი მოხმარდება ახალი სამუშაო ადგილების შექმნის ხელშეწყობას სპეციალური პროგრამების მეშვეობით, ინვესტიციების წახალისებას და ინვესტორთა მხარდაჭერას, მცირე და საშუალო ბიზნესის განვითარებას. აქცენტი გაკეთდება თბილისის პრიორიტეტულ ტერიტორიებზე კომერციული ობიექტების ხელშეწყობაზე, რაც ხელს შეუწყობს მრავალფუნქციური გარემოს შექმნას მოსახლეობისთვის სხვადასხვა უბანში და თბილისის პოლიცენტრულ განვითარებას. ჩვენ უკვე შევიმუშავეთ დედაქალაქში მცირე ბიზნესის განვითარების კომპლექსური პროგრამა, რომელიც მოიცავს: ბიზნესის საკონსულტაციო-საინფორმაციო მხარდაჭერას, მცირე ბიზნესის უნარების მოკლევადიან კურსს, სხვადასხვა სპეციალურ სასწავლო პროგრამას, ასევე მცირე ბიზნესის საკრედიტო დაწესებულებებთან საგარანტიო უზრუნველყოფისა და სესხის პროცენტის თანადაფინანსების მსხვილ პროგრამასაც. მცირე ბიზნესის პროექტებისთვის მონეტარული საგარანტიო უზრუნველყოფის ფონდში სახსრების მოცულობა იმგვარად დაიგეგმება, რომ ჯამში მხარდაჭერა გაეწიოს 1,500-2,000 პროექტს საბანკო სესხის მიღებასა და საპროცენტო განაკვეთის შემცირებაში. ამ პროგრამის საფუძველზე დამატებითი სამუშაო ადგილების რაოდენობა, სულ მცირე, 35-40 ათასი იქნება. ჩვენი პროგრამა მერიის, საბანკო დაწესებულებებისა და მცირე ბიზნესის წარმომადგენელთა სამმხრივ, კარგად გაწერილ თანამშრომლობას დაეფუძნება. ამასთან ერთად, ძირითადი აქცენტები გაკეთდება პროგრამის მონაწილეთა კარგად ინფორმირებულობაზე, ყველა პროცედურის ადვილად გავლის უნარების ფლობაზე, სუბიექტური ჩინოვნიკური გადაწყვეტილებების ალბათობის გამორიცხვასა და რეალური შედეგების წარმოჩენაზე. სპეციალურ ვებგვერდზე  განთავსდება ინფორმაცია  პროგრამაში ჩართულთა ვინაობის, მათთვის გაწეული დახმარების სახეობის შესახებ და უზრუნველყოფილი იქნება ამ პროგრამის მაქსიმალური გამჭვირვალობა. დაინტერესებულ პირებს ექნებათ კითხვების დასმის შესაძლებლობა, დასმულ კითხვებს კი ამომწურავი პასუხები თვეში ერთხელ გაეცემა“.

 

 

კახა კალაძე, „ქართული ოცნება“: თბილისის მერია შეიმუშავებს ქალაქის ქმედით ეკონომიკურ პოლიტიკას, რომელიც დაეფუძნება მუნიციპალური განვითარების გეგმას;

 

შემუშავდება და განხორციელდება ეფექტიანი საინვესტიციო პოლიტიკა;

დაიგეგმება და განხორციელდება საჯარო-კერძო პარტნიორობის პროექტები;

მოწესრიგდება სავაჭრო სივრცეები;

შემუშავდება და განხორციელდება ტურისტული პოტენციალის უკეთ ათვისების სტრატეგია;

გააქტიურდება თანამშრომლობა პარტნიორ მუნიციპალიტეტებთან;

ამოქმედდება საგრანტო პროგრამები მცირე და საშუალო მეწარმეობის, თვითდასაქმებისა და ახალი სამუშაო ადგილების შექმნის ხელშესაწყობად;

მერია ყოველწლიურად დააფინანსებს 5,000 ადამიანისათვის პროფესიული და უწყვეტი სწავლების კურსებს ქალაქში ყველაზე მოთხოვნად პროფესიებში, მათი კვალიფიკაციისა და დასაქმების შესაძლებლობების გასაუმჯობესებლად“.

 

რაც შეეხება სხვა კანდიდატებს,  მათი პასუხი ბიზნესსა და ინვესტიციებთან დაკავშირებით  უცნობია.

 

ცნობისათვის, თვითმმართველობის არჩევნები 2017 წლის 21 ოქტომბერს გაიმართება. თბილისის მერობისთვის კი 9 კანდიდატი იბრძოლებს– ალექსანდრე ელისაშვილი, კახა კალაძე, გიორგი გუგავა, ელენე ხოშტარია, ირმა ინაშვილი, გიორგი ვაშაძე, თენგიზ შერგელაშვილი, კახა კუკავა.

 

 

 

 



რა გააკეთა და რა ვერ შეძლო თბილისის მოქმედმა მერმა? ინტერვიუ დავით ნარმანიასთან

person access_time2017-10-23 20:00:20
დაახლოებით 10-15 დღეში თბილისის მოქმედ მერს, დავით ნარმანიას უფლებამოსილება შეუწყდება და ამ პოსტს კახა კალაძე გადაიბარებს. პრემიერმინისტრი მოქმედ მერს მადლობას უხდის და აცხადებს, რომ „დავით ნარმანია ჩუმად ბევრ საქმეს აკეთებდა და არაერთი კრიტიკის ქარცეცხლს გაუძლო, ხშირად დაუმსახურებელს“. დავით ნარმანია თბილისის მერი 2014 წლის 12 ივლისს გახდა, როდესაც ადგილობრივი თვითმმართველობის არჩევნების მეორე ტურში, კონკურენტი ნიკა მელია დაამარცხა. იმმედის კვირის წამყვანის ირაკლი...

Bloomberg: 2018 წლიდან სინგაპურში ავტომობილებზე ლიმიტი დაწესდება

person access_time2017-10-23 21:00:16
სინგაპური ავტომფლობელებისთვის მსოფლიოში ერთ-ერთ ყველაზე ძვირადღირებულ ადგილად ითვლება, სადაც ავტომობილებისათვის განკუთვნილი გზები ტერიტორიის 12%-ს იკავებს. მსოფლიოში ერთადერთი კუნძულოვანი ქალაქ-სახელმწიფოს ხელმძღვანელობის სურვილია, აღნიშნული რიცხვი აღარ გაიზარდოს და არსებული სივრცე სხვა მიზნებისთვის იქნეს გამოყენებული. მთავრობის განცხადებით, სინგაპურის საავტომობილო ქსელს მომავალი წლიდან არცერთი ავტომობილი არ დაემატება.   უფრო მარტივად რომ გავიგოთ: 1990 წლიდან სინგაპურში...

Financial Times: მსოფლიოში სრულყოფილი საპენსიო სისტემა არცერთ ქვეყანას არ აქვს

person access_time2017-10-23 18:00:42
მსოფლიოში საპენსიო სისტემების ხარვეზებისა და ზოგადი მდგომარეობის შესახებ სტატია Financial Times-მა გამოაქვეყნა. "ჯერ მსოფლიოს არცერთ ქვეყანას არ შეუქმნია სრულყოფილი საპენსიო სისტემა", - წერს გამოცემა და წარმოგვიდგენს Melbourne Mercer Global-ის საპენსიო სისტემის ინდექსის მონაცემებს.   გლობალური საპენსიო ინდექსის თანახმად, არ აქვს მნიშვნელობა რამდენჯერ განახორციელებენ ქვეყნები საპენსიო სისტემის რეფორმას, იმიტომ რომ საპენსიო ასაკს მიღწეულ ათობით მილიონ ადამიანს ხანდაზმულობის...

“გარდენია შევარდნაძე” - “ჩვენი საქმე ბიზნესის მიმართულებით არ უნდა განვითარდეს, ეს ნაბიჯი გაუმართლებელი იქნება”

person access_time2017-10-23 19:00:16
„გარდენია შევარდნაძე“ დეკორატიული მცენარეების სანერგეა, რომელიც ზუსტად ათი წლის წინ ზურა შევარნაძემ შექმნა. როგორც „კომერსანტთან“ საუბრისას ზურაბ შევარდნაძე აცხადებს, სანერგე უკვე დიდ ტერიტორიად იქცა და ამჟამად  ერთ ჰექტარზეა გაშენებული. დამფუძნებლის თქმით, მის წამოწყებას კონცეფცია არ გააჩნია, რადგან „გარდენია შევარდნაძე“ რამდენიმე ადამიანის გემოვნებით შექმნილი პროდუქტია.   -მას შემდგომ,...

ლადო გურგენიძემ „ლიბერთი ბანკი“ დატოვა

person access_time2017-10-23 13:30:38
ლადო გურგენიძემ „ლიბერთი ბანკი“ დატოვა.    საჯარო რეესტრში შესაბამისი ცვლილებები უკვე დარეგისტრირდა. სამეთვალყურეო საბჭოს თავმჯდომარის პოსტიდან გათავისუფლების შესახებ შეტყობინება გურგენიძეს  მალიკ იშმურატოვმა გაუგზავნა.    ცნობილია, რომ  ბანკირი და ექს-პრემიერი შესაბამის კომპენსაციას მიიღებს. მიღებული გადაწყვეტილებით, უნდა მოხდეს ლადო  გურგენიძისთვის ყოველთვიური ძირითადი ხელფასის სამმაგი ოდენობის და...

კახა კალაძე : „მერია უნდა იყოს მოქნილი სტრუქტურა ნაკლები ბიუროკრატიით“

person access_time2017-10-23 12:50:44
თბილისის მერობის კანდიდატის კახა კალაძის განცხადებით, მერია უნდა იყოს მოქნილი სტრუქტურა ნაკლები ბიუროკრატიით. ეს არის ის ერთ–ერთი საკითხი, რის მოგვარებასაც ურჩევდნენ თბილისის მომავალ მერს „კომერსანტის“ პროექტის ფარგლებში გამოკითხული ბიზნესმენები.    „იმედის კვირასთან“ პირდაპირ ეთერში  კახა კალაძემ სამომავლო გეგმებზე ისაუბრა და განაცხადა, რომ მისთვის მთავარია ნაკლები ბიუროკრატია.  მერია უნდა იყოს მოქნილი სტრუქტურა, ჩვენი...

ბანკებმა 9 თვეში 631 მლნ ლარის მოგება მიიღეს - „ასეთი მაჩვენებელი ნებისმიერი განვითარებული ქვეყნისთვის არალოგიკურია“

person access_time2017-10-23 09:00:39
სექტემბერში წინა თვესთან შედარებით კომერციული ბანკების წმინდა მოგება 70,7 მილიონი ლარით გაიზარდა.   2017 წლის იანვარ-სექტემბერში კი ბანკების წმინდა მოგებამ 631 815 000 ლარი შეადგინა, რაც 147 538 000 ლარით მეტია 2016 წლის იანვარ-სექტემბრის მაჩვენებელთან შედარებით. შარშან ამავე პერიოდში კომერციული ბანკების წმინდა მოგება 484 277 000 ლარს შეადგენდა, ანუ მოგება 30%-ით გაიზარდა.     ამასთან, სექტემბრის მდგომარეობით კომერციული ბანკების შემოსავალი 3,1 მილიარდი...

რეგიონების მასშტაბით, 63-ვე საკრებულოში უმრავლესობით „ქართული ოცნება“ შედის

person access_time2017-10-22 09:53:21
რეგიონების მასშტაბით, 63-ვე საკრებულოში უმრავლესობით „ქართული ოცნება“ შედის 09:31 22-10-2017 რეგიონების მასშტაბით, 63-ვე საკრებულოში უმრავლესობით „ქართული ოცნება“ შედის თბილისის გარდა, საქართველოს მასშტაბით 63-ვე ოლქში, პროპორციულ არჩევნებში „ქართული ოცნება“ ლიდერობს.   ცესკოს მიერ 3644 უბნიდან ამ დროისთვის გამოქვეყნებული 2268 უბნის მონაცემებით, თითქმის ყველა ოლქში მმართველი პარტიის მხარდაჭერა 50 %-ზე მაღალია.   უფრო...

ცესკოს წინასწარი შედეგები ცნობილია

person access_time2017-10-22 03:41:06
ცესკოს წინასწარი შედეგების თანახმად, თბილისის მერის არჩევნებში კახა კალაძე ლიდერობს ცესკოს წინასწარი შედეგების თანახმად, თბილისის მერის არჩევნებში კახა კალაძე ლიდერობს.   როგორც ცენტრალური საარჩევნო კომისიის თავმჯდომარემ თამარ ჟვანიამ გვიან ღამით გამართულ პრესკონფერენციაზე განაცხადა, ამ ეტაპზე დედაქალაქის მასშტაბით 737 უბნიდან 165 უბანია დათვლილი და ამ მონაცემების მიხედვით, „ქართული ოცნების“ კანდიდატმა კახა კალაძემ ამომრჩეველთა ხმების 51.4%...

კახა კალაძე - 53%, ზაალ უდუმაშვილი და ალექსანდრე ელისაშვილი - 14–14% - „გორბის“ ეგზიტპოლის შედეგი

person access_time2017-10-21 22:52:20
ტელეკომპანია ”იმედის” დაკვეთით ჩატარებული ეგზიტპოლის თანახმად, ”ქართული ოცნება - დემოკრატიული საქართველოს” თბილისის მერობის კანდიდატმა კახა კალაძემ ამომრჩეველთა 53%-ის მხარდაჭერა მიიღო.  თანაბარი, 14–14% ერგოთ ზაალ უდუმაშვილსა და ალექსანდრე ელისაშვილს, 5% კი ელენე ხოშტარიას.  ტელეკომპანია „იმედის“ დაკვეთით თვითმმართველობის არჩევნებზე ეგზიტპოლი შპს „გორბიმ“...


მსგავსი სიახლეები