"ციფროვიკი" წლის ბოლომდე საქართველოში ორ ახალ მაღაზიას გახსნის

2013-10-08 09:10:54




commersant.ge

 

ბელორუსული კომპანია "ციფროვიკი" წლის ბოლომდე საქართველოში ორ ახალ მაღაზიას გახსნის. როგორც კომპანიაში აცხადებენ, კომპიუტერული ტექნიკის მაღაზიები როგორც თბილისში, ასევე რეგიონში გაიხსნება, თუმცა ობიექტების ადგილმდებარეობა ამ დროისთვის არ სახელდება. "ახლა სწორედ დეტალებზე მუშაობა მიმდინარეობს," – აცხადებენ კომპანიაში. 

 

მათივე თქმით, "ციფროვიკის" გეგმებში მომავალ წელს 15 ახალი მაღაზიის გახსნა შედის და რომ არა მომხმარებლის მხრიდან გაზრდილი მოთხოვნა, მსგავს გადაწყვეტილებას არ მიიღებდნენ.

 

„ჩვენ ძალიან კმაყოფილები ვართ გაყიდვებით. ასე რომ არ იყოს, მომავალ წელს 15 ახალი მაღაზიის გახსნის გადაწყვეტილებას არ მივიღებდით,“ – აცხადებენ კომპანიაში. 

 

მათი თქმით, კომპანიის უპირატესობა მომსახურების მაღალი დონე და  გამოცდილი კონსულტანტები არიან. 

 

შეგახსენებთ: კომპიუტერული ტექნიკის გალერეა ”ციფროვიკმა” ქართულ ბაზარზე პირველი მაღაზია 2011 წლის ნოემბერში გახსნა. ბელორუსული კომპანია სამომავლოდ მთელი საქართველოს მასშტაბით ქსელის გაფართოებას და 5 წლის განმავლობაში 30 მაღაზიის გახსნას გეგმავს.